Edhe pse është shpallur në kërkim për pastrim parash dhe korrupsion, Klodian Zoto vijon të marrë para nga ministria e Infrastrukturës dhe Energjisë. Vetëm pak ditë më parë, konkretisht me 15 dhjetor të këtij viti kompania e Zotos ka marrë 62.7 milionë lekë si këst të radhës për të menaxhuar mbetjet urbane të qytetit të Fierit.
Kryeministri Rama përballë gazetarëve i pyetur nëse kjo është një politikë e mirë që të marrin paratë nga xhepat e varfër të qytetarëve ndërkohë që pronarët akuzohen për pastrim parash, iu drejtua gazetares që mos bëjnë propagandë me lajme të pavërteta.
Ai konfirmoi se pagesat do të vijojnë sipas kontratës.
“Për mua ministra, ish-ministra apo çfarë do qofshin, janë bashkëpunëtorë që hidhem në zjarr deri në ditën kur zjarri është për një luftë të përbashkët për të bërë punët sa më mirë. Por në momentin që dikush teksa unë hidhem në zjarr, kërkon të nxjerrë gështenja nga zjarri, nuk është më çështje ime. Por individuale me drejtësinë. Për mua janë lajme se drejtësia ka filluar të funksionojë. Asgjë që ka të bëjë me akte individuale, dhe me shkeljet individuale nuk cënon veprat e incineratëorevë që janë shpëtimtare për ata njerëz. Janë vepra me benefit shumë të madh. Janë vepra që do i kthehen shtetit. Sot impianti i Elbasanit është pronë e bashkisë. E një bashkie që jetonte nën ren e tymit të plehrave. Ka një shprehej. Të mos hedhim beben bashkë me ujin e ndotur. Do imponohen nga ligji deri kur të merret një vendim. Është Elbasanit që tashmë është nën administrimin e bashkisë. Përgjigja e ministres ishte korrekte”, tha Rama.
