Hartimi i Yurit për SPAK-un: Vendi i mahnitur nga Ju. Jeni heronjtë e fëmijëve

Ambasadorja amerikane në Tiranë, Yuri Kim, e prezantoi me nota surreale aktivitetin 2-vjeçar të Strukturës së Posaçme Kundër Korrupsionit (SPAK), në një aktivitet të zhvilluar paraditen e së Hënës në Tiranë.

Ajo deklaroi se “vendi është mahnitur nga SPAK” dhe se prokurorët e hetuesit e Byrosë Kombëtare të Hetimit (BKH) janë “heronjtë e fëmijëve dhe tmerri i kriminelëve”.

Kushdo që synon të krahasojë prokurorët e ngathët të SPAK-ut si super-heronjtë vizatimorë të “Marvel” mund të rilexojë fjalimin e mbajtur nga Yuri Kim këtë mes-dhjetori në kryeqytetin shqiptar, për t’u bindur se lufta kundër korrupsionit në Shqipëri është një “histori suksesi”, pavarësisht se rezultatet janë të padukshme për shumicën dërrmuese të qytetarëve shqiptarë.

SPAK është një prej strukturave më shpresëdhënëse të Reformës në Drejtësi në Shqipëri. Modeli i tij, sipas prezantimeve publike, kryesisht nga aktorët ndërkombëtarë që marrin mandatin në Shqipëri, është Byroja Federale Amerikane apo struktura të ngjashme në Ballkan e më gjerë, të cilat kanë vendosur para përgjegjësisë ligjore kryeministra, ish-kryeministra, ministra e paraardhës të tyre, deputetë, politikanë të lartë, e të tjerë.

LEXO EDHE  Alibeaj: Ndahemi nga kultura e Berishës, do rrimë urtë dhe do fitojmë zemrat e shqiptarëve

Rezultatet e SPAK-ut, të paktën deri më tani, janë shumë larg pritshmërive të qytetarëve shqiptarë.

Përtej mesazheve të herë pas hershme optimiste nga “Rruga e Elbasanit” dhe propagandimit të rezultateve modeste të SPAK, realiteti me korrupsionin, atë të dukshëm është aq flagrant dhe aq i paprekshëm sa para Reformës në Drejtësi, madje edhe më keq.

Në rezultatet pozitive të SPAK-ut renditet arrestimi i disa drejtuesve të Bashkisë së Lushnjes, për një tender rreth 30 milionë lekë të reja të kanalit të Bishqethmit; vendosja para përgjegjësisë ligjore të ish-zv.Ministres së Mbrojtjes, Rovena Voda, për një ‘arkë peshk”; arrestimi i ish-ministrit të Mjedisit, Lefter Koka në aferën e inceneratorëve ku qëndrojnë të paprekur zyrtarët më të lartë shtetërorë; si edhe “zyrtarucët” e Agjencisë së Blerjeve të Përqendruara për “aferën gjigande 28 milionë euro” të uniformave të Policisë së Shtetit.

/BN/