Nga BoldNews.al
Kryeministri Edi Rama ka inauguruar këtë të Premte ndërtimin e shkollës “Lasgush Poradeci” në Kombinat të Tiranës, një investim i Fondit të Katarit pas prishjes së saj nga tërmeti i 26 nëntorit 2019.
Rama deklaroi në fjalën e tij se “projektet si ky i kësaj shkolle apo edhe të tjera në Republikën e Shqipërisë, janë të financuara nga partnerët dhe administrohen nga ato që nga fillimi deri në fund të punës”, duke nxjerr blof në këtë mënyrë beniaminin e tij në krye të Bashkisë së Tiranës, Erion Veliaj.
Kryebashkiaku i Tiranës, vetëm pak ditë më parë, shkroi në rrjete sociale: “Lasgush Poradeci” në Kombinat – Shkolla më e bukur në Republikë! Çdo shkollë të re që po bëjmë në Tiranë, është më e mirë se shkollat që sapo kemi përuruar”, duke lënë të kuptohet se rindërtimi i godinës arsimore është realizuar nga institucioni që ai drejton.
Por, një raportim i publikuar më herët nga “Boldnews.al” zbuloi mashtrimin e rëndomtë të kryebashkiakut Veliaj.
Shkolla “Lasgush Poradeci” në Kombinat është një prej tre godinave të arsimit parauniversitar, i cili u caktua të rindërtohej nëpërmjet një Granti të ofruar nga Fondi i Katarit për Rindërtim dhe Zhvillim.
Projekti me vlerë 5 milionë dollarë përfshinte edhe rindërtimin e shkollës “15 Shtatori” në fshatin Pezë dhe kopshtit nr.42 në Tiranë.
Marrëveshja për Grantin është miratuar në datën 12 Shtator 2020, me përfaqësues nga pala shqiptare Ministrin e Rindërtimit, Arben Ahmetaj dhe për palën e Katarit, Drejtori i Fondit, Khalifa Jassim Al Kuëari.
Sipas marrëveshjes, Fondi i Katarit, i cili në tekst është emërtuar si “Pala e Parë”, do të ishte përgjegjës për të gjithë procedurat tenderuese dhe konsulencën e rindërtimit të godinave të reja.
Pra, duket qartë se Fondi i Katarit për Zhvillim do të merrej me gjithçka, ndërkohë që Qeveria, e konsideruar në Marrëveshje si “Palë e Dytë” dhe Bashkia e Tiranës, e emërtuar “Përfituesi”, kishin detyrim vetëm që të krijonin kushtet e nevojshme administrative për realizimin e projektit.
Por, Veliaj, i mësuar me propagandën e shpëlarë dhe nëpërmjet kontrollit strikt të pjesës më të madhe të medias, u përpoq ta “shiste” si një investim të tij rindërtimin e “Lasgush Poradecit” në Tiranë.
Megjithatë, edhe vetë kryeministri Edi Rama, me një fjali të thënë në përurimin e shkollës në Kombinat, rrëzoi të gjithë propagadën e ngritur në hapësirë boshe nga Erion Veliaj.
