Nisur nga situata e krijuar nga reshjet me intensitet të lartë gjatë ditës së sotme, drejtuesi politik i Partisë Socialiste për qarkun e Fierit, Taulant Balla ka paralajmëruar banorët e zonës së Divjakës për përmbytje.
Më parë alarmin për përmbytje në rradhët e socialistëve e jepte Erion Veliaj. Pas tij ishte Erion Braçe, ndërsa duket se detyrën e ka marrë Taulant Balla.
Ky i fundit ka shkuar në Papër të Elbasanit për të parë nivelin e prurjeve të lumit Shkumbin, ndërsa i bën thirrje banorëve për të larguar bagëtitë apo mjetet bujqësore nga tokat përgjatë lumit nga Çerma e sipërme dhe Çermat e tjera përgjatë Shkumbinit.
“Papër Elbasan. Këtu është vendi i duhur për të parë nivelin e prurjeve të Shkumbinit, të cilat mund të rrezikojnë ekonomitë bujqësore në Bashkinë e Divjakës. Prurjet janë të larta dhe vijimi i reshjeve në Librazhd mund ta rrisë edhe më tej nivelin e Shkumbinit. Prandaj duhen larguar bagëtitë apo mjetet bujqësore nga tokat përgjatë lumit nga Çerma e sipërme dhe çermat e tjera përgjatë Shkumbinit”, shkruan Balla.
Ndoshta alarmin nga Elbasani duhet ta jepte Damian Gjiknuri, i cili u caktua si drejtues politik në këtë qark pas 25 prillit, por Balla është treguar më i shkathët.
