Agjencia meteorologjike e Spanjës, Aemet, ka shpallur alarm të kuq për valë të nxehti për pjesë të tre rajoneve në Spanjën lindore, ku temperaturat maksimale mund të arrijnë midis 40 dhe 42°C. Alarmi i kuq, i cili prek pjesë të Katalonjës, Komunitetit Valencian dhe Zaragozës, sinjalizon rrezik të jashtëzakonshëm me pasoja shumë serioze të mundshme për pronën dhe popullsinë.
Sipas mediave të huaja, kjo valë e re e të nxehtit pritet të vazhdojë deri të enjten. Spanja, një vend në vijën e parë të frontit të ndryshimeve klimatike në Evropë, është mësuar me temperaturat e larta, por për disa vite është përballur me valë të të nxehtit gjithnjë e më intensive, me shumë pak pushim gjatë gjithë verës. Vala aktuale e të nxehtit është e dyta e verës pas një qershori që doli të ishte i dyti më i nxehti që nga fillimi i regjistrimeve, me një temperaturë mesatare 3.2°C më të lartë se normale dhe e cila është tejkaluar vetëm nga ajo e vitit 2025.
Spanja u përball gjithashtu me zjarret më të këqija në historinë e saj të kohëve të fundit verën e kaluar. Rritja e valëve të të nxehtit dhe pakësimi i reshjeve në disa vende janë një kombinim ideal për shfaqjen e zjarreve në pyje ose shkurre, të cilat shpërthejnë më lehtë kur bimësia dhe toka janë të thata.
