Kryemadhi: Na u mohua mandati i deputetit për shkak të marrëveshjes së fshehtë Rama-Basha

Kryetarja e LSI, Monika Kryemadhi, akuzoi sot Kryeministrin Edi Rama dhe kreun demokrat Lulzim Basha për një marrëveshje të fshehtë mes tyre, për të dëmtuar LSI në zgjedhjet e fundit parlamentare të 25 prillit.

Kryemadhi tha se në Durrës, LSI iu mohua mandati i deputetit, pasi Rama kishte marrëveshje me shtojcën e tij në opozitë, duke iu referuar kështu Lulzim Bashës.

“Rikthehem me kënaqësi në takim me ekipin e Durrësit, pas një analize të plotë që kemi zhvilluar, mbi arsyet dhe pasojat e masakrës zgjedhore të 25 Prillit.

Mandati i përfaqësimit në Kuvend, edhe pse ishte shprehur qartë nga qytetarët në kutitë e votimit, i’u mohua LSI-së në Durrës prej marrëveshjes së fshehtë të bashkëpunimit, që ekzistonte mes qeverisë dhe shtojcës së saj në radhët e opozitës së bashkuar.

LEXO EDHE  Koronavirusi në Itali/ 227 humbje jete dhe rreth 139 mijë të infektuar në 24 orët e fundit

Kjo është bërë e dukshme para, gjatë votimit, si dhe në çdo tavolinë të numërimit, ku interesi primar i bandës së inceneratorëve qeveri-opozitë, ishte mandati i kryeministrit në Durrës dhe vijimi i mandatit qeverisës.

Ne po ringrihemi më të fortë dhe të vendosur, e bashkë me qytetarët durrsak, me gratë, vajzat dhe të rinjtë energjik, do të përfaqësojmë siç duhet interesat e çdo banori të këtij qyteti të mrekullueshëm. Misioni për shtëpinë tonë të përbashkët, vijon dhe rëndësia e tij është sot më i madh se kurrë”, shkruan Kryemadhi në rrjetin social.