Nga BoldNews.al
Autoriteti Rrugor Shqiptar ka shpallur fituesin e një prej tenderëve më të majmë për ndërtim rrugësh në Durrës. Sipas dokumenteve që disponon BoldNews.al, Evis Berberi i ARRSH-së ka shpallur kompaninë Geci fitues të tenderit me objekt “ndërtim rruge Porto – Romano Durrës, vazhdimi”.
Vlera e kontratës së këtij tenderi është plot 10 milionë euro. Në tender kanë marrë pjesë kompani që kanë fituar tendera nga çdo qeveri e mëparshme, pavarësisht emrit të Kryeministrit.
Por, skema e Berberit dhe Ballukut është te specifikimet e famshme. Ka dyshime se ato bëhen për të favorizuar apo s’kualifikuar X apo Y firmë.
Në dokumentet që disponon BoldNews.al, Berberi shkruan se në këtë tender kanë garuar 8 firma të mëdha ndërtimi. Nga ato që kanë ndërtuar rrugët, apo në procedura të veçanta janë favorizuar dhe në të tjera janë s’kualifikuar. Megjithatë, në këtë rast diferenca nga oferta më e ulët te e fituesit është plot 3 milionë euro. Një shumë e konsiderueshme, por që duket se nuk shqetëson ARRSH e drejtuar nga Berberi.
Në dokumente thuhet se kompania “Alb Building” ka ofruar 736,913,771 lekë. Një kompani që ka fituar disa tendera. Ndërkohë, “Trema Engineering 2”, ka ofruar 850,589,824 lekë. Ofertat kanë vijuar me kompaninë “Pe-Vla-Ku”, e cila ka ofruar 1,012,758,583 lekë.
“ALB STAR” ka pasur një ofertë prej 1,107,418,195 lekë, ndërsa “A.N.K” me një ofertë 1,236,692,534 lekë. Në tender ka marrë pjesë edhe kompania “Fusha”, e cila ka ofruar 1,241,085,698 lekë, ndërsa “4 A-M” ka pasur një ofertë prej 1,241,412,593 lekë. Ndërkohë, fituesi i këtij tenderi, “GECI” ka ofruar një vlerë prej 1.175.927.028 lekë.
Në dokumente thuhet se oferta më e ulët, ajo e kompanisë “Alb Building” prej 7 milionë euro është s’kualifikuar pasi është “anonimalisht e ulët”. Arsyet kanë qenë çmimi i ulët i shtresave me çakull, shtresës së stabilizantit apo edhe shtresës konglomeratit.
Arsyet e s’kualifikimit kanë të bëjnë të gjitha me shtresat e zhavorrit. Por, vendimmarrja është bërë nga zyra dhe jo nga terreni, ç’ka do të mundësonin që shqiptarëve t’u kurseheshin plot 3 milionë euro.
