Ish-Kryeministri Sali Berisha u shpreh sot në emisionin “Opinion” se e vërteta nuk mund të sfumohet me gënjeshtra, falsifikime dhe mashtrime.
Berisha iu referua deklaratave të bëra nga kreu demokrat Lulzim Basha dhe zyrtarë të tjerë të kësaj partie, që e konsideruan si blof depozitimin e firmave të 4200 delegatëve te zyra e Kreut të Këshillit Kombëtar, Edi Paloka.
“Avoketërit mjeranë po i besojnë Lulzim Bashës. Mjerane është kur ata e dinë se Basha mashtron dhe vijojnë ta besojnë”, u shpreh Berisha.
Sipas tij, kjo është hera e parë në 30 vite që anëtarësia thërret Kuvendin Kombëtar.
“Injoranca nuk është argument, anëtarësia ka mbledhur Asamblenë, që në kohët më të lashta”, tha Berisha. Sipas tij, këtu janë ata që kanë frikë nga liria dhe anëtarësia, që nuk shkojnë të verifikojnë dosjet që janë 10 metra larg zyrave të tyre.
Berisha tha se ftonte ata që bëjnë avokatinë e Lulzim Bashës dhe të verifikojnë firmat, të marrin një më një, dokumentet dhe formularët.
Një paralajmërim të fortë, ish-Kryeministri e bëri edhe ndaj Edi Ramës, kur u pyet se cila nga PD do të njihet, ajo e Kuvendit Kombëtar apo ajo zyrtare e përfaqësuar nga Lulzim Basha.
“Nëse Edi Rama do të bëjë atë që nuk e bëri as Ramiz Alia, atëherë le ta provojë. Parti Demokratike ka vetëm 1, ajo është e anëtarëve”, tha Berisha.
