Kreu i Grupit Parlamentar të Partisë Socialiste, Taulant Balla, ka reaguar sot lidhur me vendimin e Gjykatës Kushtetuese për zgjedhjet e 30 qershorit 2019.
I pyetur për hapat që pritet të marrë Presidenti Ilir Meta për nxjerrjen e dekretit për mbajtjen e zgjedhjeve në 6 bashki, Balla u shpreh se respektimi i Kushtetueses është detyrim. Dhe, sipas tij, Presidenti duhet të marrë një vendimmarrje në përputhje me atë që përcakton Kushtetuta në këtë rast.
“Respektimi i Gjykatës Kushtetuese është detyrim. Presidenti si institucion i rëndësishëm kushtetues duhet të marrë të marrë vendimarrje në atë që përcakton Kushtetuta në këtë rast. Këto lloj komunikimesh janë zhvilluar në kohën e duhur. Nuk duhet të harrojmë që është Presidenti ai që e ka këtë kompetencë…,” tha Balla.
Ndërsa, i pyetur nga gazetarët nëse PS i ka gati emrat për bashkitë pa kryetar, Balla nuk dha një përgjigje të qartë.
“Nuk kam një përgjigje. PS është sot krenare për vendimmarrjen e vet për të garuar në 30 qershor, të mos harrojmë që pati përpjekje nga PD dhe forca të tjera opozitare që të minonin zhvillimin e zgjedhjeve në këtë këndvështrim, ajo që konfirmoi 30 qershori ishte një prirje…”, tha ai.
