Këshilli i Legjislacionit dhe Komisioni i Ligjeve janë njohur sot me nismat e propozuara nga Partia Demokratike lidhur me ndryshimet Kushtetuese.
Lidhur me Reformën Zgjedhore, PD, përmes kreut të Grupit Parlamentar, Alfred Rushaj, ka kërkuar miratim me konsensus të rregullave të lojës për të rikthyer besimin tek zgjedhjet
Ndryshimi tjetër i propozuar nga PD është zhbërja e ndryshimeve të njëanshme kushtetuese të 30 Korrikut 2020 për zgjedhjet, duke cënuar rëndë besimin e publikut tek zgjedhjet.
Kryetari i grupit parlamentar të PD, Alfred Rushaj, vuri në dukje 3 elementët kryesorë të Komisionit të Venecias dhe ODIHR-it për një reformë të suksesshme zgjedhore:
1. Legjislacion i qartë dhe gjithëpërfshirës që përmbush standardet ndërkombëtare dhe adreson rekomandimet e mëparshme;
2. Miratimin e legjislacionit me konsensus të gjerë pas konsultimeve të gjera publike me të gjithë palët e interesit.
3. Angazhim politik për ta zbatuar në tërësi dhe në mirëbesim legjislacion zgjedhor. Debati për sistemin zgjedhor duhet të jetë i gjerë dhe t’u mundësojë palëve të interesit të parashtrojnë efektet pozitive dhe negative të kësaj reforme.
Dukë theksuar gjetjen e Komisionit të Venecias se procedura për miratimin e ndryshimeve në Kushtetutë të 30 Korrikut ishte jashtëzakonisht e nxituar dhe në një kohë shumë të shkurtër, PD thotë se amendamentet e propozuar prej saj i shërbejnë kthimit të legjitimitetit në proceset zgjedhore përmes miratimit me konsensus të rregullave zgjedhore për një reforme të plotë që garanton zgjedhjet e lira dhe të ndershme.
