Kryeministri Edi Rama e konsideroi zgjatjen e afateve për organet e Vetting si një interes kombëtar. Rama u shpreh në emisionin “Now” se nëse tani do të ndërpritej afati i organeve të Veeting do të ishte një gjë jo në interesin kombëtar.
“Arsyeja pse ne mbetëm pa Gjykatë Kushtetuese është sepse Vetting pastroi nga kjo gjykatë ata që nuk meritonin të ishin atje dhe ky është një sukses i procesit”, tha Rama.
Kreu i Qeverisë u shpreh “më mirë djepi bosh se shejtani brenda”.
Rama tha se Vetting pa monitorimin e ONM nuk do të ishte më ky proces me këto rezultate që ka dhënë.
“Kjo nuk ka qenë reforma e mazhorancës, as e PS as e Qeverisë, por ka qenë një reformë e hedhur sëbashku me SHBA dhe BE, që janë aleatët tanë strategjikë.
Nuk dua ta besoj se opozita do i dalë përballë partnerëve tanë strategjikë dhe reformës në drejtësi”, tha Rama.
Ai tha se nuk ka çfarë të negociohet me opozitën lidhur me zgjatjen e afateve të organeve të Vetting-ut. “Ky proces duhet të jetë i ndarë nga çdo debat tjetër”, tha Rama, duke shtuar se ai lidhet me sigurinë e vendit.
