Në situatën që është Tirana, me shtatë lojtarë dhe anëtarë stafi, klubi bardheblu mund të kërkojë shtyrjen e ndeshjes me Teutën më 17 tetor. Për këtë rast ka një precedent, ndonëse në Kategorinë e Dytë. Para disa javësh, Flamurtari kërkoi në FSHF shtyrjen e takimit me Memaliajn. Shkak u bë infektimi i katër lojtarëve me COVID.
FSHF mori parasysh pretendimet e vlonjatëve dhe shtyu ndeshjen, e cila u luajt në një datë tjetër, pavarësisht akuzave nga Memaliajt. Në rastin në fjalë nuk jemi në këto nivele, por nga ana tjetër, Tirana nëse sheh një gjendje të rënduar në ekip, mund të kërkojë një gjë të tillë.
Në fakt, protokolli sanitar i FSHF-së e shumta kërkon karantinim prej 14 ditësh, por nëse lojtarët dalin negativë, ata mund të kthehen në fushën e stërvitjes dhe të lojës. Faktikisht, bardheblutë nuk kanë bërë ndonjë kërkesë për shtyrjen e ndeshjes, sepse është shpejt, pasi ndeshja luhet më 17 tetor dhe deri atëherë janë edhe 11 ditë përpara. Gjithsesi, ekziston precedenti që lejon një skuadër të shtyjë ndeshjen për një masë të jashtëzakonshme.
Edhe në Serinë A ka një rast të ngjashëm. Bëhet fjalë për sfidën Juventus-Napoli. Këta të fundit nuk u paraqitën në sfidën me torinezët për shkak COVID-i dhe e humbën sfidën të tavolinë. Pas apelimeve, gjykatat sportive u dhanë të drejtë napolitanëve dhe ndeshja u luajt në një datë të dytë me argumentin se ekipi jugor nuk kishte mundësi reale për të qenë në fushë e për të zhvilluar ndeshjen.
/Panorama Sport/
