“Ballkani i hapur” ose “Open Balkan” sikundër u pagëzua nisma e Minishengenit ballkanik nga Kryeministrat Edi Rama dhe Zoran Zaev, si dhe Presidenti serb Aleksandar Vuçiç, duket se ndan në qëndrime kreun e qeverisë shqiptare me zyrtarët më të lartë të BE-së, përfshi edhe Presidenten e Bashkimit Europian, Ursula Von Der Leyen.
Në konferencën për mediat me Kryeministrin Edi Rama, por edhe në takimet zyrtare që zhvilloi në Tiranë, zyrtarja më e lartë e BE-së, nuk përmendi në asnjë moment “Ballkanin e Hapur”, ndërsa vuri theksin në procesin e Berlinit, ashtu sikundër bëri edhe kancelarja në largim e Gjermanisë, Angela Merkel, pak ditë më parë kur në Shqipëri taki liderët e vendeve të Rajonit.
Në Tiranë, Presidentja e BE u pyet për nismën e “Ballkanit të Hapur”, ndërsa pohoi mbështje për çdo nismë rajonale, vuri theksin te gjithëpërfshirja. Të paktën deri më tani, nisma e inicuar nga Vuçiç e Rama, e mbështetur nga Zaev, është refuzuar nga Kosova, Mali i zi dhe Bosnja, që nuk kanë marrë pjesë në asnjë prej takimeve të zhvilluara, me përjashtim të takimit të parë, që duket se ndau rrugët e 6 vendeve, pro dhe kundra.
Por, Rama ka insistuar në nismën e “Open Balkan”, madje duke thumbuar edhe procesin e Berlinit të inicuar nga kancelarja Merkel rreth 8 vite më parë.
“Me Procesin e Berlinit shkojmë nga samiti në samit dhe përparim nuk ka. Në 8 vite ne ende s’kemi mundur të heqim një mur me tarifa. Ende nuk kemi zhdukur barrierat për eksportuesit”, tha Kryeministri. Dhe në vijim, të mbështetjes për Open Balkan, Rama tha se kjo është një nismë që kush do firmos, pa të drejtën e vetos për të bllokuar procesin, duke thumbuar sërisht BE mbi mënyrën e vendimmarrjes, ku vetoja mund të bllokojë një proces.
E ndërsa Rama mund të investohet gjithë kohën për të mbrojtur idenë e “Open Balkan”, ashtu sikundër mund të bëjnv edhe Zaev në Maqedoni apo Vuçiç në Serbi, duket se zyrtarët më të lartë të Brukselit, nuk kanë ndonjë preokupim të lartë për të çuar përpara një nismë, që përjashton automatikisht 3 vende, Bosnjen, Malin e Zi dhe Kosovën.
Duket se kushti “gjithëpërfshirje” është ai që i intereson Brukselit, zyrtarëve të BE, dhe jo emërtimi i një nisme, që herë pagëzohet si mini-Shengen dhe herë si “Open Balkan”.
