Sali Berisha është edhe “de jure” jashtë grupit parlamentar të Partisë Demokratike.
Kuvendi ka regjistruar grupet parlamentare, ku tek ai i PD-së është reflektuar numri i deputetëve që ka depozituar kreu i partisë, Lulzim Basha.
Kësisoj, Sali Berisha, edhe pse deklaroi se ishte pjesë e grupit parlamentar të PD-së, tashmë është zyrtarisht deputet pa grup parlamentar.
Sot, ish-kryeministri Sali Berisha pritet të nisë fushatën e bashkëbisedimit me demokratët.
“Të dashur miq, Ditën e Enjte me datë 16 shtator ora 18:00, në Hotel Rogner, nisim ciklin e ‘Foltores për një Parti Demokratike më të bashkuar, më të forte dhe me të hapur’”, shkroi dje Berisha në një postim në rrjetet sociale. Ai sqaron se foltorja do të jetë një bashkëbisedim me demokratë dhe demokrate që nis në Tiranë dhe do udhëtojë në mbarë vendin. “Jeni të mirëpritur”, është ftesa me të cilën u mbyll reagimi i ish-kryeministrit.
