Zv/ministrja e Shëndetësisë dhe kryetarja e komitetit të ekspertëve, Mira Rakacolli, nuk ka nguruar të ushtrojë një presion të hapur ndaj disa prej kategorive lidhur me vaksinimin.
Rakacolli, pavarësisht se shprehet se vaksinat janë në dorën e qytetarëve nëse bëhen ose jo, theksoi se ata që refuzojnë duhet të provojnë çdo 3-5 ditë që janë negative në testin Covid.
“Kur jeton në një komunitet çdokush ka përgjegjësi qytetare për të gjithë. Një person i cili nuk pranon të vaksinohet është vendimi i tij, edhe pse sipas nesh është zgjedhje e gabuar, por ai në ato intervale kohore që quhet nga ekspertët të arsyeshme duhet të sjellë vazhdimisht provë për PCR, por kjo ka kosto. Çdo 3-5 ditë duhet të çosh PCR-në,” u shpreh zv/ministrja për Top News.
Komiteti Teknik ka vendosur që mësuesit, mjekët dhe studentët e kanë me detyrim vaksinimin, ose përndryshe do të duhet të provojnë me teste PCR shumë shpesh se nuk janë të infektuar, pasi konsiderohet grupe me ndikim të madh në shoqëri.
Dhe deklarata e Rakacollit pikërisht ka të bëjë me këto kategori dhe duket se më shumë nga të gjitha prek studentët. Këta të fundit kanë kundërshtuar vaksinimin e detyruar, por njëherazi kërkojnë rikthimin në auditore në vitin e ri shkollor. Nuk dihet nëse Qeveria do t´i qëndrojë deri në fund variantit të vaksinimit me detyrim, apo do të aplikojë variantin e mësimit online ose të alternuar për Universitetet, në rast se nuk pranohet presioni për vaksina të detyrueshme.
Prej ditësh ka një debat lidhur me vaksinimin e detyruar të qytetarëve, ndërsa ekspertë të pavarur janë shprehur se ata që e kanë kaluar Covid-19 nuk është e nevojshme të vaksinohen, pasi kanë një mbrojtje natyrale, me përjashtim të shtresave që nuk sigurojnë një përgjigje imune të mirë, që mundet të kenë nevojë për një dozë vaksinë.
Por debati që zhvillohet është gjithashtu se çfarë vaksinash do të aplikohen në rastet kur ato janë të detyrueshme? Në Shqipëri qarkullojnë dy prej vaksinave tashmë të certifikuara nga EMA dhe CDC, Pfizer dhe AstraZeneca, ndërkohë që gjithashtu është aplikuar edhe Sinovac dhe Sputink V, që kanë marrv një miratim për përdorim të shpejtë nga OBSH, por nuk njihen nga EMA dhe CDC.
