Kreu demokrat Lulzim Basha pritet të mbledhë javën e ardhshme Kryesinë e re dhe Grupin Parlamentar, ku pritet të përcaktohen edhe strategjitë që do të ndjekë opozita e drejtuar nga PD në legjislaturën e 10-të të Kuvendit të Shqipërisë.
Mësohet se mbledhja e parë e Kryesisë së PD pritet të konstituojë forumin më të lartë politik të kësaj partie, ndërsa më pas do të ketë edhe një mbledhje të Grupit Parlamentar, ku opozita numëron 59 ligjvënës, mes të cilëve edhe 3 deputetë të PDIU, Vangjel Dulen e PBDNJ, Agron Dukën e PAA, Fatmer Mediun e PR dhe Dashamir Shehin e LZHK.
Pritet që në mbledhjet e njëpasnjëshme, opozita të përcaktojë edhe qëndrimet në Kuvendin e ri, që do të nisë punimet më 10 shtator, ndërsa më parë, partia më e madhe opozitare ka zgjedhur edhe kandidaturën e saj për Nënkryetar Parlamenti, që është Enkelejd Alibeaj.
Ndërkohë që Grupi Parlamentar do të drejtohet nga Alfred Rrushaj, i cili është një nga nënkryetarët e rinj të PD, nuk dihet nëse deputetët e dalë nga partitë e vogla, aleate të PD-së, do të vijojnë të jenë pjesë e këtij grupimi parlamentar, apo do të grupohen me një grup parlamentar më vete, apo do të shfaqen si deputetë jashtë grupimit parlamentar të PD.
Për të formuar një grupim parlamentar duhen 7 deputetë, aq sa kanë edhe partitë e vogla, por problemi qëndron në faktin se mes PBDNJ së Dules dhe PDIU të Idrizit ka ndasi të mëdha dhe duket paksa e vështirë, për të mos thënë e pamundur, që Dule dhe Idrizi të jenë në një grup të njëjtë parlamentar.
Ndoshta një deputet i dhuruar nga PD mund të çojë në krijimin e një grupi parlamentar opozitar, kjo si pjesë e strategjisë parlamentare, për të fituar kohën e diskutimeve në parlament. E njëjta gjë mund të ndodhë edhe me LSI, e cila ka 4 mandate, dhe për të formuar grupin parlamentar do t´i duhen edhe 3 deputetë.
Nëse ndodh që PD t´i huazojë 3 deputetë të tjerë LSI, ajo mund të ketë një grupim parlamentar, duke bërë që në Parlament të jenë 3 grupe parlamentare opozitare, pavarësisht se kanë 63 deputetë.
