Florenc C. nga fshati Suk i Roskovecit i dha fund jetës mëngjesin e sotëm duke u vetëvrarë me armë zjarri. 48-vjeçari jetonte në banesë me bashkëshorten e tij.
Mësohet se viktima kishte tre vite që merrej me bujqësi, ndërsa më herët ka qenë në emigracion.
Pasi është kthyer paratë i kishte investuar në sera, ndërkohë të afërmit thonë se kishte shumë borxhe dhe se kishte marrë gjithashtu edhe kredi. Për shkak të gjendjes së rënduar psikologjike, 48-vjeçari dyshohet t’i këtë dhënë fund jetës.
“Ishte shumë i mirë. Merrej me sera. Me ne shkonte shumë mirë. Kam dëgjuar që vuante nga depresioni dhe nga borxhet dhe kredia”, thotë një fqinj për “abcnews”.
“Sot dëgjuam zhurmën, të qarat e të shoqes. Serat i kishte të mbjella. Njëra serë i dështoi dhe e shkuli. Ai ka marrë kredi, jo me lekët e tij se nuk kishte. Po kështu ishte njeri i sjellshëm. Fëmijët i ka në emigrim”, tregon një tjetër.
“Sot rreth orës 06:55, në fshatin Suk 1, Roskovec, shtetasi F.C., 48 vjeç, dyshohet se në kushte depresioni është vetëvrarë me armë zjarri pistoletë në banesën e tij. Grupi hetimor ndodhet në vendngjarje dhe po punon për sqarimin e rrethanave të ngjarjes”, thuhet në njoftim e policisë për rastin.
