Shqipëria ka një bilanc negativ lidhur me pandeminë e Covid-19, megjithatë kjo nuk e ka penguar Qeverinë që të vijojë show-n dhe propogandën.
Ministria e Shëndetësisë ishte sot te spitali Infektiv, atje ku një vit më parë nisi kurimi i pacientëve të parë me Covid, ndërsa tre ditë më pas Kryeministri Edi Rama shpalli gjendjen e shtetrrethimit, duke mbyllur vendin, ndërsa koronavirusin e konsideroi një armik.
Duke i shpallur luftë Covid-19, Rama nuk kurseu as autoblindat e FA-ve, madje duke i detyruar të parakalonin në rrugë edhe me armë zjarri.
Muajt e parë ishin një injektim i frikës dhe panikut, ndërkohë që Bota lëvizte drejt gjetjes së testeve që do të mundësonin vënien nën kontroll të pandemisë.
Që prej fillimit të pandemisë në vend janë shënuar 113,580 raste pozitive, 1956 humbje jete, ndërsa 75,887 qytetarë e kanë fituar betejën me virusin e rrezikshëm. Aktualisht në vendin tonë janë 35,737 raste aktive me COVID19. Ndonëse shifrat mund të jenë edhe më të larta, duke pasur parasysh se ato që deklarohen nga Ministria e Shëndetësisë bazohen vetëm te testimet e kufizuara, apo vdekjet në spitale
“Unë jam e kënaqur që brenda kësaj jave përfundojmë vaksinimin e ekipeve tona mjekësore, infiermierore dhe ky është një hap drejt fitores ndaj virusit por nuk është mjaftueshëm sepse në fakt e gjithë popullata, sidomos ata të cilët janë grupe prioritare, do të vijojnë vaksinimin, ashtu sikurse ne jemi duke bërë.
Më shumë se 20 mijë vaksinime janë kryer deri tani, presim të hënën të vijnë dozat e tjera të kontratës së Pfizer, për të vijuar vaksinimet e të gjithë personelit dhe të moshuarve që tashmë i kemi kryer me dozën e parë. Presim nga COVAX të vijnë dozat e vaksinës AstraZeneca dhe do të njoftohemi besoj në një moment të shpejtë për datën e mbërritjes së 14,400 vaksinave nga instrumenti COVAX”, tha Manastirliu.
