Tenderi i ushqimeve/ Fali Olta Xhaçkën, SPAK merr të pandehur tre zyrtarë të Ministrisë së Mbrojtjes

Tre zyrtarë të Ministrisë së Mbrojtjes janë marrë të pandehur nga SPAK, pas kallëzimit të bërë nga Partia Demokratike mbi tenderin e ushqimeve të familjeve në nevojë.

Nga raportimet mësohet se zyrtarët e marrë nën hetim janë Ylli Imeri, Dafina Keca dhe Andrea Dapaj, të cilët dyshohet se kanë shkelur ligjin për zhvillimin e një gare tenderimi të drejtë, duke favorizuar një kompani të caktuar.

Bëhet fjalë për tenderin e ushqimeve për familjet në nevojë të marrë nga Ministria e Mbrojtjes, kur ky dikaster drejtohej nga Olta Xhaçka.

Gjatë hetimeve, SPAK mori në pyetje edhe ministren Xhaçka, por duket se e ka kursyer për ta përfshirë në hetime.

PD depozitoi kallzimin penal në SPAK në fillim të muajit prill 2020.

Ndër personat e kallëzuar nga PD, janë Ministrja e Mbrojtjes Olta Xhaçka, anëtarët e Komisionit të Vlerësimit të Ofertave në Ministrinë e Mbrojtjes, shoqëria “EUROVIA” shpknj, me administrator Emir Shefiti dhe shoqëria XPERT SYSTEMS sh.p.k., me administrator Renald Gova.

6 janë veprat penale të referuara në kallëzim, ku përfshihen “Korrupsioni aktiv i personave që ushtrojnë funksione publike”, “Korrupsioni aktiv i funksionarëve të lartë shtetërorë”, “Shpërdorimit të detyrës”, “Shkelja e barazisë së pjesëmarrësve në tendera apo ankande publike”, “Korrupsioni pasiv i personave që ushtrojnë funksione publike”, “Korrupsioni pasiv i funksionarëve të lartë shtetëror”.

LEXO EDHE  Sa të rrezikuar jemi nga varianti "Delta"? Ja çfarë thotë mjeku shqiptar në Itali

Në kallëzimin e firmosur nga Sekretari i Përgjithshëm i PD Gazment Bardhi, thuhet se: Ministria e Mbrojtjes duhet të argumentonte dhe të dokumentonte përzgjedhjen e kandidatëve që ka ftuar në këtë procedurë pa garë. Rezulton e provuar në dokumentet e tenderit, se ndryshe nga sa detyron ligji, mungon argumentimi se përse janë ftuar kompanitë e shpallura fituese “EUROVIA” shpknj dhe shoqëria XPERT SYSTEMS sh.p.k., në kushtet ku asnjëra prej tyre nuk është e specializuar në fushën e objektit të prokurimit, por kanë bërë shtimin e objektit të veprimtarisë vetëm disa ditë përpara hapjes së procedurës së prokurimit.

Gjithashtu, në kallëzim evidentohet se kompania “EUROVIA” shpknj, nuk përmbush kriterin ligjor të eksperiencës së ngjashme ne fushën e furnizimit me produkte ushqimore në 3 vitet e fundit. “Kjo kompani, ka shtuar në objektin e veprimtarisë së saj “tregtimin e ushqimeve”, vetëm 6 ditë përpara se të shpallej tenderi dhe për pasojë nuk ka asnjë eksperiencë në tregtimin e produkteve ushqimore.