Nënkryetari i LSI-së, Petrit Vasili, ka reaguar për procedimin penal që policia ka nisur ndaj dy vajzave që denoncuan mungesën e mjekimit për babanë e tyre që ndërroi jetë në Spitalin Infektiv.
Në një deklaratë për mediat, Vasili shprehet se vendimi i policisë është shokues dhe pa asnjë logjikë humane.
“I gjithë opinioni është shumë i tronditur dhe është pothuaj i shastisur dhe i shokuar se si ka mundësi që sot Policia e Edi Ramës procedon dhe hap hetim penal për përhapje informacioni të rremë për dy vajza, të cilat kanë humbur babanë e tyre nga Covid-i”,- deklaron Petrit Vasili.
Ai ka reaguar dhe për procesin e vaksinimit, duke e cilësuar si një tallje të qeverisë me qytetarët.
“Me talljen dhe me mashtrimin e trastave me vaksina, Edi Rama po ofendon të gjithë shqiptarët. Ç ‘punë kanë shqiptarët të shikojnë në Vlorë, me një dorë vaksina, Edi Ramën me në krye Damian Gjiknurin. Po, Damian Gjiknuri është i njohur si një hajdut ordiner votash, për çfarë ndodhet ai në krah të fushatës së vaksinimit të Edi Ramës, para vlonjatëve? Që t’u vjedhë edhe vaksinat, se votat ua kanë vjedhur?”,- deklaroi Vasili.
