Kreu demokrat, Lulzim Basha, tha sot se për Partinë Demokratike rruga europiane dhe euroatlantike e Shqipërisë është e pakthyeshme dhe e patjetërsueshme.
Gjatë, një takimi me përfaqësues të shoqërisë civile, Basha tha se ne kishim besimin e qytetarëve dhe drejtonim Shqipërinë kur patëm ftesën për t’u anëtarësuar në NATO.
“Zotimi im, ne anëtarësojmë Shqipërinë me të drejta të plota në Bashkimin Europian. 25 prilli nuk është thjeshtë një garë elektorale.
25 prilli një udhëkryq, nëse Shqipëria do të çojë deri në fund rrugëtimin e saj europian ose jo”, tha kreu demokrat, ndërsa akuzoi Qeverinë Rama se e ka mbajtur Shqipërinë në vendnumëro.
Sipas tij, kapacitetet e Shqipërisë për të përdorur fondet e dhëna janë jashtëzakonisht të ulëta, duke shtuar se “për Partinë Demokratike, për mua, Shqipëria europiane fillon me mirëqeverisjen”.
“Zbatimi do të jetë fjala kyçe e reformave të Shqipërisë drejt Bashkimit Europian. Për ne, për Partinë Demokratike, për mua, Shqipëria europiane fillon me mirëqeverisjen. Zbatimi do të jetë fjala kyçe e reformave të Shqipërisë drejt Bashkimit Europian. Unë dhe Partia Demokratike vijmë nga një trashëgimi bindëse në zbatimin e reformave”, tha Basha.
Ai theksoi se injorimi i kushteve nga Qeveria aktuale, çoi në shtimin e tyre. Në këtë kuadër, Basha tha se plotësimi i tyre është detyra e parë e qeverisë së kryesuar prej tij.
“Ne do të bëjmë çdo përpjekje që zgjedhjet e 25 Prillit të jenë të lira. Do të mbrojmë votën nga çdo përpjekje kriminale për deformimin e saj . Do të sjellim një kulturë të re politike në Shqipëri përmes qeverisjes së përgjegjshme.Partia Demokratike dhe unë angazhohemi të mbajmë duart larg nga sistemi i ri i drejtësisë”, theksoi Basha.
Në këtë kuadër, ai tha se do të promovojmë një sistem që garanton drejtësi dhe që ka besimin e qytetarëve, një sistem i pakapur nga politika, nga oligarkia apo nga krimi.
