Kryeministri Edi Rama në komunikimin e përjavshëm me gazetarët, ka folur për gjendjen në spitale. Rama tha se ata që ishin përfshirë në skemën e mashtrimit të një sanitareje te spitali Shefqet Ndroqi nuk mund të hedhin baltë mbi bluzat e bardha, që kanë shpëtuar mijëra e mijëra jetë nga Covid-19.
“Boll me llumin e thashethemeve, kush ka fakte le të denoncojë, qoftë te unë, qoftë te ministrja e Shëndetësisë, qoftë te drejtuesit e spitalit, policia dhe në rast se nuk kanë besim te asnjë nga këto, atëherë, le ti drejtohen mediave. Ata që u përfshinë në atë skemë janë sot në burg, dhe uroj mos dalin asnjëherë që andej, pasi nuk ishte thjesht një korrupsion apo mashtrim, por ishte një torturë ndaj atyre pacientëve”, tha Rama.
Ai tha se reformës që ne e kemi nisur e tani jemi në kushtet kur kemi një bazë solide për të hedhur hapin e madh të autonomisë spitalore, të motivimit të mëtejshëm të mjekëve në bazë të kartës së performancës së tyre, të diverzifikimit sipas performancës dhe të shpërblimit të mjekëve. Ai tha se mjekët nuk do të punojnë më në spitale publik dhe private pasi rrogat do t’i mjaftojnë.
Ndër të tjera ai ka komentuar edhe arrestimin e tre infermiereve dhe një sanitareje lidhur me marrjen e ryshfeteve në spitalin Covid 2.
“Falenderoj mediat për rastet e bëra publike. Rastet e arrestimit te ‘Shefqet Ndroqi’, lajm i mirë. Është një mesazh i qartë për të gjithë bluzat e bardha që janë një pakicë e vogël por që janë të mjaftueshme për të ndotur rrugën e transformimit jo vetëm të kushteve por dhe të performancës që vazhdon. Është një mesazh i qartë për të ardhmen pasi unë besoj që kura afatgjatë dhe e suksesshëm për të adresuar plagën kanceroze të ryshfetit në sistemin shëndetësore është thellimi i sistemit një reformë që ne e kemi nisur dhe jemi në kushtet që kemi një bazë solide për të hedhë hapin e madh të autonomisë spitalore dhe të motivimit të mëtejshëm në bazë të kartës së përformancës së tyre”, ka thënë Rama.
