Ish-ministri i Jashtëm, Tritan Shehu, duke komentuar deklaratat gjithmonë e më antieuropiane të Ramës, shkruan ndër të tjera se ky i fundit po kthehet në një rrezik për të ardhmen e Shqipërisë dhe të rajonit.
Sipas tij, strategjia e Ramës është ta largojë Shqipërinë nga Europa e Perëndimi për të na degdisur larg demokracive, të cilat e kanë shpallur “Non grata”, pikërisht sepse ai ka shkelur rëndë ato parime të mëdha mbi të cilat mbështeten liritë, vlerat, progresi, dinjtetit qytetar e njerëzor.
“Edhe sulmet e ofendimet e sotme ndaj Koordinatorit të PE me një gjuhë të pa tolerueshme e provokative, që janë në vazhden e atyre ndaj përfaqësueseve të vendeve të BE, të ShBA e Brukselit vetë, të shoqëruara me qëndrime e pozicione të tij domethënëse politike, e konfirmojnë këtë!
Tentativa e agresione të qëllimshme e dashakeqe këto, krejt në kundërshtim me interesat tona kombëtare, objektivat madhore të integrimit europian, të pa tjetërsueshme e të vetmet për shqiptarët e Rajonin.
Pra Shqipëria e shqiptarët kudo ku ndodhen për pasojë janë përsëri sot perballë rreziqeve të mëdha, që disa herë na kanë shoqëruar me reperkusione tejet të dhimbëshme në historinë tonë, largimin nga Familja jonë Europiane e Perëndimi.
Fatmirësisht afër nesh tashti është 25 Prilli, mundësia e madhe për të na shpëtuar nga kjo fatkeqësi kombëtare që na kanoset dhe vendosur përsëri në shinat e demokracisë, lirive, zhvillimit e integrimit europian.
Prandaj ky 25 Prill ka po atë peshë, rëndësi, pasoja mbi të sotmen e të ardhmen tonë jo vetem si Shqipëri, ashtu si kishte e realizoi 22 Marsi i 1992.
Prandaj më 25 Prill shqiptarët do të zgjedhin të “ardhmen”, duke i thëne “Jo” përsëritjes së tragjedive historike”, shprehet Shehu.