Ish-ministri i Shëndetësisë në qeverisjen e parë të PD-së, Tritan Shehu, ngriti akuza se vaksina anti-Covid ka hyrë si mall kontrabandë në Shqipëri, ndonëse Kryeministri pretendon se vaksinat janë bërë dhuratë nga një vend i BE-së dhe janë të pajisura me dokumentacion.
Sipas tij, malli ka kaluar nga pjesa e Rinasit ku kalojnë pasagjerët dhe është pa dokumenta.
“Këtë vaksinë nuk e ka dërguar Pfizer se ata nuk dërgojnë vaksinë pa certifikatë. Rama tha që e ka dërguar një shtet i BE, po asnjë shtet si doli për zot. Unë e di nga ka ardhur, por nuk e them tani, ardhja është ilegale.
Se po ta dërgonte Pfizer do e sillte me polici, dhe me një dosje të madhe.
Malli është kontrabandë dhe s’ka dokumenta. Malli ka kaluar nga pjesa e Rinasit ku kalojnë pasagjerët, ka kaluar dorazi. Unë e këshilloj Silvën shumë miqësisht (Silva Bino), mos merr ngarkesa që nuk të takojnë”, u shpreh demokrati në emisionin “Open”.
Sipas tij, sot ne nuk dimë asgjë lidhur me këtë vaksinë, si është transportuar, si është ruajtur, çfarë certifikatash ka, pra mungojnë dokumentet.
Shehu tha se në rastin e këtyre vaksinave janë shkelur ligjet e vendit, madje SPAK duhet të hetojë.
“Ka vepër penale, SPAK duhet të hetojë. Ne sot nuk e dimë se çfarë e ka shkaktuar infektimin e doktor Pëllumb Piperos. Në vende të tjera raste të tilla janë hetuar. E dini ju që në itali janë bllokuar seri të tëra vaksinash kur janë shfaqur raste të ngjashme, janë kryer hetime”, tha Shehu.
