Ish-ministri i Drejtësisë, Ylli Manjani, ka ironizuar përmes një postimi në rrjetet sociale, analistët që sipas tij, janë rrjeshtuar në krah të Qeverisë dhe po tentojnë të zhvlerësojnë përgjimet e publikuara së fundmi të antimafies italiane.
Manjani shkruan se pas 4 ditësh mohim, mbrëmjen e djeshme, i madhi i antimedias, urdhëroi të “hapet tema” mbi përgjimet, dhe ata që e mohuan lajmin me besnikëri, mbrëmë e hapën përnjëherë.
“Nga jehona në rrjete sociale duket se mbrëmë mediat qenkan marrë me përgjimet Italiane të Antimafias.
Si ka mundësi që pas 4 ditësh mohim, krejt pa pritur mediat merren të gjitha me çështjen që mohuan?!
Mendja më thotë se ka dhënë urdhër i madhi i Antimedias, “të hapet tema”.
Kjo spjegon faktin se të gjitha mediat, të cilat e kishin mohuar lajmin me besnikëri, mbrëmë e hapën përnjëherë.
Nga ana tjetër, mesa lexova, të gjithë përfaqësuesit e udhëheqësit në studio kanë mbrojtur me fanatizëm idioti tezat që:
“bisedat e mafiozëve janë idotësira”, “prokurori i antimafias është kot”,
“Përgjimet e tyre nuk janë prova për ne”
Dhe gjithmonë: “fajin e ka opozita”.
Qesharakë pa kufinj!
#antimedianëveprim#”, shkruan Manjani.
Reagimi i ish-ministrit ka ardhur pasi mbrëmjen e djeshme pothuajse të gjitha emisionet u fokusuan te përgjimet e antimafies italiane, ndërsa analistë, të njohur për qëndrimet e tyre pro Rilidnjes, i konsideruan faktet e publikuara si të pavlera dhe si një lojë politike.
