Nga Boldnews.al
Individi, i caktuar nga Edi Rama si “i plotfuqishmi” i Partisë Socialiste në zonën e Jugut, deputeti Alket Hyseni, ka zgjedhur të mbajë “heshtje peshku” për skandalin e ndarjes në mes të rrugës së Borshit, vetëm pak muaj pasi kishte përfunduar rikonstruksioni dhe mirëmbajtja nga kompania “Salillari”.
Deputeti Hyseni ka qenë një ndër promovuesit dhe propaganduesit kryesorë të punimeve të “Salillarit” në aksin rrugor Llogara-Sarandë.
Në një postim të verës së vitit 2020, Alket Hyseni deklaronte: “Riparohen shtresat asfaltike të rrugës Llogara-Sarandë, për të lehtësuar lëvizjen e turistëve në Rivierë”.
Postimi shoqërohej me foto reklamuese të makinerive të kompanisë “Salillari”, të cilat dukeshin shumë të angazhuara në rritjen e performancës rrugore në zonën e bregdetit jugor.
Por, cilësia e vërtetë e punimeve u shfaq në fillim të janarit 2021.
Disa shira që përfshinë zonën Jugore, karakteristike për periudhën e dimrit në Shqipëri, e ndanë në mes rrugën e Borshit, duke nxjerrë në pah rrugën skandaloze e duke ngritur dyshime për cilësinë e punimeve dhe abuzimin nga kompania mirëmbajtëse, si edhe nga autoriteti kontraktor, Autoriteti Rrugor Shqiptar.
Pas kësaj situate, Alket Hyseni ka zgjedhur të fshihet pas gishtit, dhe të mos japë asnjë koment.
Më së paku, si deputet i Jugut, atij i takonte që të ngrinte zërin dhe të kërkonte përgjegjësitë për dëmin që u shkaktohet jo vetëm financave publike, por edhe përditshmërisë së mijëra shqiptarëve që e përdorin çdo ditë aksin rrugor që kalon nga fshati Borsh.
Deputeti Hyseni është aktiv në rrjete sociale edhe gjatë këtyre ditëve. Në profilin e tij gjenden të përditësuara aktivitetet me natyrë politike në zonën e Sarandës, Ksamilit dhe fshatrat përreth.
Por, ai nuk ka arritur ende të shohë se në Borsh, rruga është shkatërruar, për shkak të punimeve skandaloze, të reklamuara edhe prej atij vetë disa muaj më parë.
