Kryetari i Partisë Republikane, Fatmir Mediu, ka theksuar rëndësinë e bashkimit të së djathtës për të larguar regjimin e Edi Ramës.
Në një takim me koordinatorët e qarkut të Tiranës, Mediu ka shpjeguar se “votat që duhen për të marrë një mandat në koalicion, janë po aq vota sa duhen për të marrë një mandat edhe si parti më vete.”
“Po shkojmë në zgjedhje. Edi Rama po bën çdo gjë, çdo ditë, çdo moment. E filloi me Reformën Zgjedhore, me ndryshimet kushtetuese, për t`a përçarë opozitën, vazhdoi me Kodin Zgjedhor që opozita të ishte e ndarë, sepse qëllimi i tij ishte përçarja e opozitës, në mënyrë që ai të kontrollojë marrëdhënie, të krijojë pazare, të marrë pushtet, nëpërmjet krimit, korrupsionit dhe blerjes së votës. Kjo kërkon padyshim një organizim opozitar të qenësishëm.
E përsëris, votat që duhen për të marrë një mandat në koalicion, janë po aq vota sa duhen për të marrë një mandat edhe si parti më vete.
I kemi shërbyer ndershmërisht së djathtës, i kemi shërbyer ndershmërisht qëndrimit tonë politik, si forcë e djathtë, për të bërë gjënë më të mirë për vendin tonë, ne kemi menduar që duhet të bashkohemi për të larguar këtë regjim të korruptuar, regjimin e Edi Ramës”, tha Mediu.
