Zbardhen detaje të reja nga plagosja e ndodhur një ditë më parë në Vlorë. Ngjarja ku mbeti i plagosur me armë 25-vjeçari me inicialet Xh. M., ka ndodhur pas një sherri mes dy familjesh.
Policia përmes një njoftimi bën të ditur se ka arrestuar në flagrancë autorin e dyshuar të kësaj ngjarjeje, por edhe të plagosurin me akuzën për veprën penale ‘Dhuna në familje’.
“Specialistët për Hetimin e Krimeve në Komisariatin e Policisë Vlorë, në vijim të veprimeve hetimore të kryera për zbardhjen dhe dokumentimin e ngjarjes së ndodhur paraditen e datës 31.12.2020, ku si pasojë mbeti i plagosur me armë zjarri, shtetasi Xh. M., 25 vjeç, arrestuan në flagrancë autorin e ngjarjes, shtetasin K. K., 18 vjeç, banues në lagjen ‘Partizani’, Vlorë, për veprat penale ‘Vrasja në rrethana cilësuese, e mbetur në tentativë’ dhe ‘Armëmbajtje pa leje’.
Nga hetimet paraprake të kryera ka rezultuar se ngjarja ka ndodhur pas një konflikti në familje, ku shtetasi Xh. M., ka ushtruar dhunë ndaj bashkëjetueses së tij dhe babait të saj shtetasit A. K., 46 vjeç banues në lagjen ‘Partizani’, Vlorë (familjarë të autorit të ngjarjes, shtetasit K.K).
Në përfundim të veprimeve është arrestuar në flagrancë dhe shtetasi Xh. M., për veprën penale ‘Dhuna në familje’”, thekson policia.
Sipas saj, gjithashtu janë proceduar në gjendje të lirë për veprat penale ‘Plagosje e lehtë me dashje’, ‘Kanosja’ dhe ‘Dhunimi i banesës’ shtetasit N. H., K.H., F. H., (familjarë të shtetasit të dëmtuar M. H), pasi këta të fundit kanë dhunuar banesën dhe kanë kanosur shtetasin A. K., dhe familjarët e tij.
“Në cilësinë e provës materiale janë sekuestruar një armë zjarri pistoletë dhe 1 sasi municioni luftarak.
Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme procedurale”, shprehet policia.
