Shqipëria dhe SHBA kanë firmosur traktatin e ekstradimeve mes dy vendeve, duke rifreskuar atë të 1 marsit 1933, i firmosur mes Faik Konicës, ministri i Shqipërisë në Uashington dhe Cordell HUll, Sekretari i SHBA në atë kohë.
Në traktatin e rifreskuar, zgjerohen dhe përditësohen kategoritë e veprave penale për të cilat mund të kërkohet ekstradimi nga palët, mbi bazën e parimit të kriminalitetit të dyfishtë, duke përfshirë tashmë edhe veprat penale më të reja si ato me karakter financiar, tatimor dhe doganor, korrupsionin, veprat mjedisore, veprat në fushën informatike e çdo vepër që dënohet me heqje të lirisë për një periudhë maksimale prej më shumë se një viti ose për një dënim më të rëndë.
Ambasadorja e SHBA në Shqipëri Yuri Kim ka deklaruar se ky traktat do të shërbejë për të kapur kriminelët që fshihen pas kufijve.
“Ky traktat siguron një tjetër armë për t’i dhënë fund pandëshkueshmërisë së kriminelëve që përpiqen t’i shpëtojnë drejtësisë duke u fshehur pas kufijve. Ata do të dorëzohen sipas kushteve të këtij traktati. Sa më efikase të jetë Shqipëria në ndjekjen penale të krimit ndërkombëtar aq më gati do të jetë për të qenë krah vende europiane.
Ne nxisim punën e SPAK në vendosjen e përparësive. Ne po punojmë edhe me BKH në çdo hap të zhvillimit të saj duke ndihmuar në zgjedhjen e më të mirëve. Ndihma që SPAK të funksionojë plotësisht është prioritet për SHBA. Suksesi i SPAK nuk është vetëm ajo që SHBA pret por ajo që meritojnë shqiptarët”, tha diplomatja.
