Hollanda do të hyjë në një bllokim të dytë të rreptë për të paktën pesë javë, ka njoftuar kryeministri i vendit, raporton Sky News.
Familjeve u është kërkuar që të presin jo më shumë se dy vizitorë mbi moshën 13 vjeç, edhe pse një përjashtim do të bëhet për tre ditë rreth Krishtlindjes kur ata mund të mirëpresin tre persona në shtëpi.
Në një fjalim të rrallë televiziv, i cili në sfond kishte zhurmat e protestuesve që godisnin tenxheret dhe tiganët jashtë zyrës së tij, Kryeministri i vendit, Mark Rutte, i tha kombit: “Holanda po mbyllet. Ne e kuptojmë seriozitetin e vendimeve tona, shumë pak para Krishtlindjeve”.
Holanda është një tjetër vend evropian që njofton se do të zbatojë masa të rrepta gjatë periudhës festive pas një rritjeje të infeksioneve. Gjermania më parë njoftoi kufizime të ngjashme.
Njerëzit në Holandë janë këshilluar të qëndrojnë në shtëpi, të mos udhëtojnë në punë dhe të shmangin kontaktet me të tjerët sa më shumë që të jetë e mundur.
Si pasojë, të gjithë vendet publike, përfshirë qendrat e kujdesit ditor, palestrat, muzetë, kopshtet zoologjike, kinematë, parukeritë dhe sallonet e bukurisë, do të mbyllen deri në 19 Janar.
Shkollat do të mbyllen gjithashtu deri më 18 janar.
Sidoqoftë, supermarketet, bankat dhe farmacitë do të lejohen të qëndrojnë të hapura.
“Sa më pak kontakte të kemi, aq më mirë”, tha Rutte.
“Ne duhet të bëjmë gjithçka për të arritur në një nivel më të mirë. Dhe po, do të bëhet më mirë”.
“Realiteti është se nuk kemi të bëjmë me një grip, siç besojnë disa nga ata që protestojnë jashtë, por një virus që mund të arrijë këdo”.
Ditën e dielë, Hollanda regjistroi shifrën më të lartë të infeksioneve që nga fillimi i pandemisë, duke raportuar 10,000 raste, ndërkohë që 8,500 raste të tjera me Covid-19 u njoftuan të hënën.
