Stafi mjekësor i spitalit Infektiv, ka reaguar mbi denoncimin e fortë të kreut demokrat, Lulzim Basha, i cili nga studio e emisionit Opinion, tha se po fshihet numri i vdekjeve të pacientëve me Covid-19.
Basha tha se shifrat e nxjerra në media nga Komiteti i Ekspertëve nuk rakordojnë me ato të dala nga morgu sa i përket personave që kanë humbur jetën nga covid.
Ai theksoi se Rama dhe rilindja që prej fillimit kanë bërë politikë me të vdekurit dhe se sot situata ka dalë jashtë kontrollit.
Por në një deklaratë të lexuar nga shefja e Infektivit, Najada Çomo, thuhet se deklarata e Bashës nuk është e vërtetë.
Çomo shprehet se askush nuk mund të bëjë politikë me një çështje kaq të ndjeshme.
“Shprehim publikisht habinë për deklaratën e Bashës dje në një emision televiziv. Goditje e akuza të përpjekjeve tona gjithë këto muaj.
Përballë akuzash të tilla e shohim të domosdoshme të informojmë publikun se, nuk është kurrësesi e vërtetë që janë fshehur vdêkje nga covid, është praktikisht e pamundur.
Kjo pasi çdo pacient që ndërron jetë përcillet për në morg bashkë me kartelën shoqëruese që përmban dhe arsyen e vdêkjes , e cila është firmosur dhe vulosur me përgjegjësi profesionale dhe ligjore nga mjeku që e ka trajtuar deri në momentin e fundit. Shkaku i vdêkjes nuk vendoset nga politikanët, por bëhet nga mjeku.
Në rast se kjo akuzë përsëritet ne do të ftojmë organet kompetente që të bëjnë hetimet e duhura”, tha Najada Çomo.
Nuk dihet pse stafi mjekësor i Infektivit reagoi ndaj deklaratës së kreut të opozitës, përsa kohë Basha nuk hodhi akuza apo hije dyshimi ndaj mjekëve, por iu referuar shifrave të publikuara nga Komiteti Teknik.
Deri më tani, në të gjitha reagimet, mjekët dhe stafet mjekësore që ndodhen në atë që quhet vija e parë e zjarrit me armikun e padukshëm kanë marrë vlerësime maksimale, ndërsa i është kërkuar Qeverisë që të mbështesë financiarisht bluzat e bardha dhe t´u garantojë mjetet e nevojshme në përballimin e pandemisë.
Ndaj deklaratës së kreut të opozitës mund të reagonte Ministria e Shëndetësisë, Komiteti Teknik apo edhe Kryeministri, por duket se ata kanë zgjedhur të përdorin bluzat e bardha të një prej spitaleve Covid, për t´iu kundërvënë një deklarate apo fakteve që paraqiti kreu i PD-së.
