Kryeministri Edi Rama ka reaguar sot lidhur me hetimin që Prokuroria Speciale po kryen ndaj deputetit socialist Ervin Bushati, ndaj të cilit PD kishte depozituar një kallzim penal.
SPAK përmes një shkrese drejtuar PD, e informon se Bushati po hetohet lidhur me fshehjen e pronave dhe fallsifikim dokumentesh.
Vetë deputeti socialist është shprehur se është i hapur për hetimet, ndërsa lidhur me pronat thotë se ato i ka të trashëguara nga familja e tij.
I pyetur nga mediat, Rama tha se PS nuk është mburojë e askujt, përfshi këtu edhe deputetit, i cili është një nga 3 emrat e caktuar nga Kryeministri për fushatën zgjedhore në Tiranë.
“Ne kemi një ndryshim të madh nga partia e syrit e çdo parti tjetër, që ka vetëm hallin e syrit dhe faqes. PS-ja nuk është bërë dhe nuk bëhet asnjëherë mburojë e askujt.
Qëllimi është i përbashkët, përgjegjësia individuale. Kjo dihet për këdo që futet në PS. Për çdo kapërcim mes vijës ndarëve për qëllim të përbashkët, secili përgjigjet vetë.
Për sa i përket veshjes apo zhveshjes, kjo është një çështje që nuk i takon syrit, por familjes tonë politike. Na takon ne dhe e dimë ne se kur e bëjmë. Mos na qani hallin, sepse ju kemi si hudhër për syrin e keq”, tha Rama.
