Italia ka ngritur alarmin për mungesë të stafit mjekësor në vend. Autoritetet shëndetësore kanë deklaruar se kushtet fizike spitalore janë maksimale dhe se ka mjaftueshëm ventilatorë për të përballuar valën e dytë. Numri i shtretërve të ICU, të cilët aktualisht janë rreth 5,200, do të shkojnë në 11,500. Megjithatë nuk ka mjekë dhe infermierë mjaftueshëm për të siguruar shërbim cilësor.
Sipas Carlo Palermo, udhëheqës kombëtar i unionit të mjekëve Anaao Assomed, nevojiten të paktën 2,000 mjekë të cilët mund përdorin aparatet respiratore.
Sipas tij, një numër i lartë i specializantëve të mjekësisë dhe infermierisë janë në detyrë për të mbushur mungesën e stafit, megjithatë as kjo nuk mjafton për të plotësuar kërkesat për kujdes shëndetësor.
Rajonet në Itali mund të marrin vendimet e tyre kur bëhet fjalë për shëndetin publik. Në zonat në veri të vendit, të tilla si Piemonte dhe Lombardia, autoritetet lokale u janë drejtuar OJQ-ve për ndihmë duke u kërkuar atyre të dërgojnë mjekë nga e gjithë bota.
Shoqata e Mjekëve të Huaj që jetojnë në Itali është një grup që përfaqëson gjithsej 77 500 profesionistë përfshirë infermierë. Për t’u punësuar nevojitet nënshtetësi italiane, por duke parë urgjencën mjekësore, një dekret i fundit ka lejuar aplikimet për punësim të menjëhershëm. Kjo procedurë nuk aplikohet në të gjithë rajonet italiane dhe shoqata mjekësore ka bërë thirrje që legjislacioni të zbatohet në të gjithë vendin.
