Pandemia ka kaluar në kolaps ekonominë dhe shëndetësinë në vend. Ky fakt duket se e ka bërë kryeministrin Edi Rama të reagojë disa herë sot, duke parandjerë se kjo do jetë kosto e rëndë elektorale. Së fundmi ai bëri një reagim tjetër kundër opozitës.
“Shumë tërbim sot nga çeta e çakërdisur e opozitaristëve pa vizion, pa program, pa ide dhe as din e iman, me daljen para syve tuaj të pamjeve e të dëshmive nga brendia e spitaleve Covid 1 dhe 3!
Duan t’ju fusin ankthin, t’ju kallin tmerrin e t’ju mbushin me panik, për “spitalet në kolaps”, “të sëmurët që dergjen dyshemeve”, “situatën jashtë kontrollit” dhe ëndërrojnë që kështu të ndodhë vërtetë, të sëmureni sa më shumë, të vdesin sa më shumë njerëz, të bëhet qameti fare, sepse kjo është shpresa e tyre e fundit për t’u rikthyer në pushtet…” shkruan Rama.
Por ish-ministri i Drejtësisë, Ylli Manjani, e quan paradoks që Rama shqetësohet kur gabon opozita.
“Edi Rama i sugjeron opozitës se po të flasë për pandeminë “do ndëshkohet në zgjedhje”. Në fakt këtë “sugjerim” Edi Rama e ka për opozitën sa herë kjo e fundit denoncon inceneratorët;
-banesat në letër të banorëve që i humbën nga tërmeti;
-koncensionet e PPP abuzive;
-daljen nga rruga e anëtarësimit në BE; mbylljen e gjykatave;
-thellimin e borxhit;
-mosrritjen e pagave e pensioneve; mbylljen e ekonomise në shum pak duar;
-liritë e të drejtat e shkelura të njeriut;
-rrenat e pushtetit me audiot e video; etj skandale plot.
Gati përditë kështu…
Pra opozita u ndëshkoka elektoralisht, sipas Ramës, nëse merret me këto gjëra… Kështu i bie që opozita duket “të lavdërojë” Ramën që të fitojë zgjedhjet. Super logjikë! Të puthsha mendjen, siç kemi thënë. Po mirë, pse “shqetësohet” Rama për këto “gabime” që bën opozita?! Ajo i paska humbur edhe zgjedhjet që vijnë pas mandatit të tretë të Tij. Se me gjithë këto “gabime”, opozita s’paska asnjë shpresë …!? Ç’hall e bën Ramën të japë “sugjerime” të tilla?!
Ndërkohë mbështes atë opozitë që “humb zgjedhjet” duke denoncuar dhe protestuar. U shoftë më mirë ajo opozitë që kyç gojën!” shkruan ai.