Një video e publikuar në Instagram nga portali JOQ tregon qartazi sesi nxënësit e shkollës së mesme “Naim Frashëri” në Durrës shkojnë në shtëpi me autobus si “sardelet në kuti”.
Pjesa më e madhe e tyre janë pa maska. Situata është tepër skandaloze, në kushtet kur Covid-19 po shënon shifra alarmante në të infektuar dhe në humbje jetësh dhe kur pikërisht shkollat po konsiderohen si vatrat kryesore të shpërndarjes së infeksionit.
Të pyetur nga Boldnews.al, nxënës të kësaj shkolle konfirmuan se në bordin e autobusit që transportonte “sardelet”, ndodhej edhe zv.drejtori i gjimnazit, Ilir Paja, çka e bën edhe më të rëndë skandalin.
Boldnews.al kontaktoi me drejtoreshën e shkollës, Znj. Ezmeralda Xheraj, e cila konfirmoi vërtetësinë e pamjeve të transmetuara, të cilat i referohen ngjarjes së ndodhur në datën 2 nëntor, rreth orës 13.50.
“Jam njoftuar me SMS nga nëndrejtori i shkollës, z. Ilir Paja, se njëri prej dy autobusëve që bënin transportin e nxënësve në mesditë ishte prishur. Nëndrejtori më komunikoi se për këtë arsye, z. Paja ka hipur të gjithë nxënësit në një autobus (nga dy që duhet të ishin në dispozicion” dhe janë nisur”, pohon drejtoresha Xheraj, e cila shton se është vënë në dijeni të ngjarjes vetëm kur autobusi po mbërrinte në destinacion pasi, sipas saj, nëse do të kishte marrë dijeni në kohën ë duhur, nuk do ta lejonte shkeljen e rregullave të protokollit anti-Covid.
Zonja Xheraj tha se për këtë situatë ka informuar zyrtarisht Drejtorinë Arsimore Rajonale Durrës, strukturë e cila merret me menaxhimin dhe penalizimet për rastet e mosrespektimit të masave anti-Covid.
E pyetur posaçërisht nga Boldnews.al se cili personi i ngarkuar në shkollën “Naim Frashëri” si person përgjegjës për respektimin e masave anti-Covid, drejtoresha pohoi se zyrtari përgjegjës është zv.drejtori i shkollës, z. Ilir Paja, i cili njëkohësisht ka përgjegjësinë edhe për mbarëvajtjen e transportit të nxënësve nëpërmjet autobusëve.
Pra, pikërisht personi që duhet të përgjigjet për respektimin e masave anti-Covid, është nëndrejtori Paja, i cili ndodhej në autobus bashkë me nxënësit pa maska dhe pa distancim fizik.
Boldnews.al u përpoq të merrte një përgjigje edhe nga drejtoresha e porsaemëruar e Drejtorisë Arsimore Rajonale të Durrësit, Znj. Ana Dhamo, por deri në momentin e përgatitjes së këtij materiali, drejtoresha Dhamo nuk i është përgjigjur kërkesës me SMS.
Ngjarja duket si qindra të tjera në kohë pandemie, kur masat anti-Covid në institucionet arsimore neglizhohen masivisht, por është rasti i parë i konfirmuar kur shkelja e këtyre masave bëhet me urdhër të personit të ngarkuar me përgjegjësinë për respektimin e tyre. Një dëshmi e faktit se sa seriozisht e ka marrë Rilindja dhe vetë Ministria e Arsimit dhe Sporteve problematikën që po shkakton vdekjen deri tani të mbi 500 shqiptarëve.
Shkolla “Naim Frashëri” ka në dispozicion pesë autobusë për transportimin e nxënësve drejt shkollës “Bajram Curri”, në zonën e Plazhit, për shkak se godina e “Naim Frashërit” ka pësuar probleme të rënda nga tërmeti i 26 nëntorit dhe pritet të shembet.
