Ervin Nurka, 39-vjeçari shqiptar, i arrestuar me akuzën e kultivimit të lëndëve narkotike në një shtëpi në Mbretërinë e Bashkuar, do të qëndrojë për 15 muaj në burg. Është ky vendimi i një gjykate angleze ndaj shqiptarit, i cili u kap nga policia më 4 gusht 2020, në një banesë dy katëshe në Fell View Avenue në zonën Woodhouse.
Policia gjeti në banesë sasi të mëdha kanabisi që rritej në dhomën e ndenjes dhe tre dhoma gjumi, me drita ultravjollcë dhe dritare të mbuluara nga perde të trasha dhe çarçafë plastikë për të parandaluar largimin e nxehtësisë.
Policia sekuestroi celularë, 300 paundë, së bashku me një pasaportë shqiptare dhe leje drejtimi në emër të 39-vjeçarit Ervin Nurka, i cili u gjet në shtëpi dhe u arrestua.
Fqinjët treguan se kishin parë hyrje-dalje të dyshimta në banesë.
Një ekspert i drogës arriti në përfundimin se prodhimi i pothuajse 100 bimëve kanabis dhe shitja e tyre do t’u sillte një fitim prej 77,000 dollarësh.
Nurka pranoi në polici krimin e tij, ndërsa pretendoi se punonte si kopshtar, pasi kishte borxh një sasi të madhe parash disa personave me precedentë kriminale.
39-vjeçari shqiptar kishte thënë në gjykatë se ngaqë nuk kishte arritur dot që ta paguante borxhin, ishte përballur me kërcënime me vdekje në Shqipëri.
Pasi shqyrtoi faktet gjykata arriti në përfundimin se shqiptari siguronte sasi të mëdha parash përmes kësaj veprimtarie kriminale dhe borxhi nuk mund të merrej si justifikim.
Gjykata vendosi fillimisht masën e sigurisë “arrest me burg” për 15 muaj për shqiptarin Ervin Nurka.
