VIDEO/ Rama merr në mbrojtje Komitetin e Ekspertëve, ja çfarë publikon

Kryeministri Edi Rama i është përgjigjur me një video akuzave të opozitës lidhur me Komitetin Teknik, të ngritur mbi menaxhimin e pandemisë Covid-19, dhe pas të cilit për muaj me rradhë u fsheh Kreu i Qeverisë me vendimet që merrte në rrjetet sociale.

Rama ka publikuar në rrjet videon ku tregohen anëtarët e Komitetit, pjesa më e madhe e të cilëve janë drejtues të institucioneve. Me shumë pak përjashtime, anëtarët e tjerë të Komitetit, pavarësisht se janë mjekë, nuk janë ekspertë të rastin e sëmundjeve infektive.

Komiteti drejtohet nga Mira Rakacolli, zv.ministre e Shëndetësisë, e cila është neurologe. Skënder Brataj i Urgjencës Kombëtare ka punuar si kirurg estetist, ndërsa mungojnë epidemiologët, që duken se janë në një pakicë.

Në videon e shpërndarë nga Rama,janë nxjerrë shkollimet dhe jetëshkrimet e Mira Rakacollit, Najda Çomos apo Skënder Bratajt, për të cilin thuhet se rrezikoi dhe jetën e tij, kur u prek me Covid në krye të detyrës.

LEXO EDHE  Raporti i Numbeo: Rritet kosto e jetesës në Shqipëri, nga më të shtrenjtat në Rajon

Për ta bërë më bindëse panoramën, dhe lodhjen që ndjejnë këta ekspertë, zyra e shtypit të Ramës, ka mbuluar dhe të gjithë kronikën me kolonë muzikore, por edhe me lotët e Najada Çomos.

Ajo që ka refuzuar qeveria të përgjigjet në gjithë këto ditët e fundit, është fakti se në të gjitha qytetet në vend ka mungesë tamponesh, ndërsa në rastin kur ato iu merren qytetarëve, përgjigja vijohet më shumë se një javë, një rast ky i paprecedentë në vende të tjera të botës.

Po ashtu një tjetër pikë për të cilën qeveria nuk jep llogari, është dhe ajo e gjendjes së spitaleve, ku vetëm nga Sanatoriumi, i kanë dhënë fund jetës tre persona, e ku familjarët hedhin akuza se mungojnë psikologët.