Edhe pse Komisioneri për Zgjerimin, Oliver Varhleyi, i kërkoi Kuvendit që të presë opinionin e Venecias për ndryshimet në Kodin Zgjedhor, Kryeministri Edi Rama duket i vendosur për të rrëzuar dekretin e Presidentit lidhur me rishqyrtimin e ndryshimeve në Kod.
Përmes një postimi në rrjetet sociale, Rama thotë se Kuvendi nuk do të humbasë asnjë ditë kohë nga rivotimi në Kuvend, ndërsa e konsideron Presidentin Meta një esktremist.
Kreu i qeverisë shprehet se mendimi i Venecias është kurdoherë i mirëseardhur, por procedura e parashikon qartë se dekretet e presidentit mund të shihen vetëm në Kuvend.
“Ky President i angazhuar si një ekstremist kundër Parlamentit dhe Qeverisë Shqiptare, s’merr dot peng askënd dhe asgjë përveç institucionit që fatkeqësisht ka marrë peng!Opinioni i Venezias mirësetëvijë kur të vijë, por koha për këto zgjedhje s’pret asnjë ditë jashtë procedurave.
Mendimi i Venecias është gjithnjë i mirëseardhur, por për një ligj të votuar dhe të refuzuar nga Presidenti, procedura është e qartë: Refuzimi i Presidentit pranohet ose rrëzohet nga parlamenti! PARLAMENTI DO TË RISHPREHET PA HUMBUR ASNJË DITË!”, shkruan Rama.
