Nga Klodian Tomorri
Partitë politike në Shqipëri përgjithësisht kanë frikë nga gara.
Edi Rama ka frikë nga gara dhe ndaj bën marifete për të vjedhur zgjedhjet. Opozita duke sulmuar Jozefina Topallin pse hap parti tregon se edhe asaj nuk i pëlqen gara dhe kërkon monopolin e të gjitha votave kundër qeverisë.
Çështja është e thjeshtë. Ka një Kushtetutë që thotë se çdokush ka të drejtë të zgjedhe dhe të zgjidhet. Ky është thelbi i këtij sistemi dhe parimi që garanton lirinë e njerëzve.
Unë nuk e njoh fare zonjën Topalli. Ajo mund të jetë zyrtarja më e korruptuar dhe më e paaftë në historinë e Partisë Demokratike. Por edhe nëse do të ishte kështu, në të dy rastet prapë fajtore do të ishte vet PD.
E para që ka mbajtur për 8 vjet një njeri të paaftë në treshen e figurave më të rëndësishme të Partisë. E dyta, që minimalisht nuk ka marrë asnjë masë administrative ndaj zonjës Topalli apo nuk ka bërë një denoncim në prokurori ndaj saj, nëse ajo me të vërtetë ka abuzuar me postet e larta që ka mbajtur gjatë qeverisjes së PD-së.
Ndërsa kjo historia e tradhëtisë është totalisht e paqenë. E para nuk është trafikim votash, sepse nuk po merr votat në emër të PD-së para zgjedhjeve dhe po i çon tek Rama pas zgjedhjeve. Nuk është ky rasti. Ajo po del të garojë vetë. E dyta, këto janë rregullat e lojës në politike.
Në Britani, deputetët e rrëzojnë kryeministrin e Partisë së tyre tek kafja e Parlamentit sa herë t’ju teket. Kanë rrëzuar Thatcherin. Edhe një herë, Thatcherin. me votat e Thatcherit.
Nëse zonja Topalli merr vota, një gjë është e sigurtë. Ato nuk janë vota të PD-së, por të sajat. Dhe mazhoranca në Parlament është të unifikosh interesat dhe rrymat e ndryshme të perfaqesimit. Po nuk e bëre dot këtë s’ke maxhorancë. Kaq e thjeshtë është.
PD ashtu si çdo parti duhet të maksimalizoje votat e saj. Nëse mendon se në Shkoder zonja Topalli i merr vota, duhet të përpiqet që ato vota t’i fusë tek thesi i saj.
Por kjo bëhet duke bindur njerëzit që të votojne ty. Jo duke akuzuar Jozefinën se po bën tradhëti. S’po bën asnjë tradhëti ajo. Thjesht po del në garë. Edhe nëse e ka shtyrë Rama të bëjë parti, prapë nuk është tradhëti.
