Biznesmeni Andon Dhima denoncon në polici dy persona ende të paidentifikuar se e kanë ndjekur deri në hyrjen e pallatit ku ai banon dhe e kanë kërcënuar.
Kjo ngjarje është shënuar pak pas mesnatës së të enjtes, rreth orës 00:40 minuta. Denoncimi është bërë në komisariatin numër 2 në kryeqytet, ndërsa biznesmeni Dhima ka rrëfyer para oficerëve të policisë se si ndodhi ngjarja.
Ai ka pohuar se ishte duke shkuar për në banesën e tij, teksa dy persona, të rinj në moshë, e kanë ndjekur prej disa minutash. ka shpjeguar se asnjërin prej tyre nuk e njihte.
Dhima thotë se pranë hyrjes së pallatit, njëri nga djemtë ka futur dorën në xhep duke pretenduar se mbante një pistoletë.
Biznesmeni i ka treguar policisë se pas këtij kërcënimi mund të fshihet ish deputeti socialist, Ben Blushi, me të cilin pranon se ka një konflikt të hapur.
Zyrtarisht, policia deklaron se, është duke punuar për të identifikuar autorët, si dhe për të zbardhur rrethanat e plota të kësaj ngjarjes. Për këtë janë sekuestruar pamjet e kamerave të sigurisë por aktualisht ende nuk ka gjurmë nga dy autorët e kërcënimit. /abcnews/
