Kryeprokurori Olsian Çela ka kërkuar hetimin e krimit fnanciar, ndërsa ka shprehur vërejtje për drejtuesit e Prokurorive në Korçë, lidhur me këtë aspekt.
Gjatë një takimi të zhvilluar në këtë qytet me prokurorët, Çela tha se është i rëndësishëm krijimi i seksioneve që do hetojnë krimin financiar.
“Numri i veprave penale që hetohen dhe lidhen me krimin financiar është i ulët në Korçë. Kjo imponon një qasje proaktive. Duhet të shfrytëzohet çdo informacion që lidhet me asetet kriminale. Nuk duhet neglizhuar informacioni i medias.
Nuk mund të keni një rol pasiv dhe vetëm kështu mund të keni një rol cilësor. Dua të trajtoj edhe dy tre probleme të tjera. Në korrik është miratuar udhëzimi me drejtuesit. Ky udhëzim garanton atë që ligji ia ka dhënë prokurorëve, pavarësinë në vendimmarrje. Ne i kemi dhënë mundësinë çdo prokurori të mbrojë me fanatizëm pavarësinë e tij. Prokuroria e Korçës në këtë drejtim ka qenë model”, tha Çela.
Në vijim ai u shpreh se regjistri i brendshëm i cili krijohet në bazë të këtij udhëzimi është thelbësor.
“Ju duhet të garantoni sundimin e ligjit. Duhet të ruani pavarësinë ndaj ndërhyrjes ndaj çdo faktori të jashtëm në punën tuaj. Nëse do përmbushni detyrën tuaj me besnikëri ndaj ligjit, garancitë do të rrisin rezultatet dhe atë që na mungon, besimin e publikut. Nëse ne do arrijmë ta bëjmë këtë, puna juaj do vlerësohet maskimalisht. Reforma nuk përfundoi me krijimin e SPAK dhe as me zgjedhjen e drejtuesit të Prokurorisë së Përgjithshme”, tha Kryeprokurori.
