Presidenti Ilir Meta tha mbrëmjen e sotme se me aktin e djeshëm në Kuvendin e Shqipërisë është shtyrë procesi i integrimit të vendit në Bashkimin Europian.
Në emisionin Tempora, Meta tha se me minimin që i bëhet procesit zgjedhor dhe standardeve që duhen plotësuar, nuk bëhet fjalë që do të ketë përparim të procesit gjatë Presidencës gjermane.
“Çfarë ka thënë Presidenti lidhur me procesin e integrimit ajo ka dalë. Me vendimin që mori dje Parlamenti do të shtohen parakushtet për Shqipërinë, dhe largqoftë të fitojë Rilindja në 25 prill, gjë që nuk do të ndodhi, atëherë procesi do të hyjë në një rrugë tjetër”, tha Meta.
Në vijim ai shtoi se publikoi emrat e deputetëve që votuan pro ndryshimeve në Kodin Zgjedhor që ata të mbajnë përgjegjësi individuale, mos fshihen më pas teorive që i bëmë për të ardhmen e popullit shqiptar.
“Ajo që ndodhi dje ishte korrupsion individual, se ata që votuan pro nuk e bënë për popullin jo, as për partitë sepse nuk kanë ndonjë parti. Përgjegjësia do jetë individuale, disa do bëhen shembuj”, tha Meta.
