Presidenti Ilir Meta hodhi akuza të forta mbrëmjen e sotme në emisionin “Tempora”, kur tha se Shqipëria po qeveriset nga oligarkë që i kanë kthyer biznesmenët e ndershëm në nënkontraktorë të nënkontraktorëve.
Meta tha se janë këto oligarkë që marrin vendimet, që paguajnë gjyqtarë e prokurorë, që vendosin kush arrestohet e kush jo.
“25 prilli do të jetë një referendum i pashembullt në historinë e popullit shqiptar. Do të jem me qytetarët kudo, në rrugë e në sheshe, sepse njerëzit duhet ta kuptojnë se o do të jenë me çunin e Kristaq Ramës o me rrugën e duhur.
Mbajeni mend shqiptarët do të vijnë me not nga Italia apo në këmbë nga Greqia për të votuar më 25 prill”, tha Meta.
Me tone të ashpra ai u shpreh se Edi Rama po provokon shqiptarët por do të ketë fatin e Marcos që iku nga vendi i tij me helikopter.
“Nuk ka diktator që mund t´i rezistojë popullit kur ai del në rrugë dhe populli do të dalë në rrugë të jeni të bindur”, tha Meta.
