Kryeministri Edi Rama, njëherazi edhe Kryetar i PS-së, mblodhi mbrëmjen e së martës, shtabin elektoral të partisë në kuadër të përgatitjeve të zgjedhjeve të ardhshme parlamentare të 25 prillit 2021.
Rama tha se pas pak ditësh socialistët dhe jo vetëm do të kenë mundësi që të vlerësojnë punën e ministrave.
“Ne vijojmë punën, diskutojmë për gjendjen në të gjitha aspektet për një ndërveprim të ri me anëtarësinë që ka filluar që të marrë ato kodet dixhitale për të dhënë vlerësimet. Pas pak ditësh do të dalë edhe vlerësimi, kërkesa për vlerësim për ministrat që do të jetë edhe përtej anëtarësisë.
Çdo kush që është i interesuar do të mund të hyjë për të bërë vlerësim. Ndërkohë që përgatisim edhe hapin e tretë që është ftesa për të konsideruar shprehje interesi për të përfaqësuar komunitetin në parlament”, tha Rama.
I pyetur nëse janë përzgjedhur emrat për kryesinë e re socialiste, ndërsa të premten do të mblidhet Asambleja, Rama tha se nuk do të flas sot për atë që do të ndodhë të premten, se deri të premten ka shumë kohë për shumë gjëra të tjera”.
Më konkretisht Rama u pyet nëse Ditmir Bushati, ish-ministri i Jashtëm, të cilit nuk iu besua asnjë qark si drejtues politik, do të jetë anëtar i Kryesisë, por kreu socialist iu shmang një përgjigjeje direkte. “Ah faleminderit”, u shpreh Rama.
Prej kohësh mediat raportojnë se Bushati nuk do të jetë më pjesë e Kryesisë së PS, madje, ndoshta as kandidat për deputet
