Pasi u përdorën në Kuvend si një patericë e Qeverisë Rama, sot deputetët e asaj që u quajt si “opozita” parlamentare, u përballën edhe me talljet e Kryeministrit.
“Juve ju ra bixha njëherë, por harrojeni se ju bie më bixha. Juve ju mbetën zarat në dorë se ruleta ra në lanë, por harrojeni se ju mund të vini këtu dhe të kërkoni të na imponoheni”, tha Edi Rama, duke iu drejtuar opozitarëve parlamentarë.
Në vijim, Rama i konsideroi deputetët opozitarë si një kopje e shëmtuar.
“Jeni një kopje e shëmtuar. Unë s’kam pyetur për origjinalin dhe jo për ju që jeni kopje. Ju i doni të gjitha, edhe të ulet pragu sikundër e doni ju, edhe që kryetarët të kandidojnë në të gjitha qarqet me partitë që doni të krijoni? Ju doni që komisionet të depolitizohen siç i doni ju, edhe listat të hapen siç i doni ju. Po pse çfarë jemi ne lopa, që ju doni të mbushni kovën që ju ra?”, tha Rama.
Në vijim ai tha se ky ligj që ne propozojmë është për ata që marrin vota, jo për ata që shpresojnë të kapin ndonjë votë duke hedhur rrjetat.
