FOTO/ Vokshi: Surrogati Balla mund të shajë e mallkojë, por opozitën se ndalon dot

Ish-deputetja Albana Vokshi ka reaguar ndaj Taulant Ballës, kreut të grupit parlamentar socialist, me gjuhë urrejtje sulmoi ish-ligjvënësen Orjola Pampuri, pasi kjo e fundit paraqiti me fakte dështimin e qeverisë Rama përballë pandemisë.

Vokshi shkruan se është fakt që Shqipëria është e fundit për numrin e testimeve për 1 milion banorë, sikundër është fakt se Shqipëria është ndër 4 vendet e para për vdekjet ditore.

Gjithashtu Vokshi shkruan se është fakt se Shqipëria renditet ndër vendet me numrin më të lartë të përhapjes së rasteve të reja, sikundër është fakt se propaganda shfaq spitale si në Zvicër, ndërsa qytetarët blejnë edhe respiratorë.

“Edi Rama dhe surrogati i tij Taulant Balla mund të shajnë e mallkojnë gjithë ditën, por nuk e ndalojnë dot opozitën dhe qytetarët të ngrenë zërin kundër braktisjes dhe padrejtësive të qeverisë.

Shqipëria është sot një zonë e kuqe COVID dhe i izoluar nga Europa, sepse qeveria e Taulant Ballës kishte prioritet vjedhjen me tendera sekretë, jo bërjen e testimeve masive dhe marrjen e masave të tjera për mospërhapjen e virusit”, shkruan Vokshi, duke postuar foton e mëposhtme.

LEXO EDHE  Demokratët e Beratit përzënë nga lista ish-deputetin Astrit Veliaj

Reagimi i Vokshit, erdhi pasi Taulant Balla, kërkoi që të nisë hetimi ndaj një video të shpërndarë nga Oriola Pampuri, e cila u shpreh se në ‘shëndetësinë falas’ të Edi Ramës, shqiptarët blejnë vetë nga ushqimi deri tek respiratorët’.

Përmes një postimi në rrjetin social, Balla thekson se gjatë këtyre 6 muajve në Shqipëri përveç luftës me armikun e padukshëm, ka edhe një betejë me shpifjet, baltën dhe panikun që përhapin politikanë tipikë të së keqes.

Sipas Ballës, kasandrat e opozitës kanë nisur një betejë të re, atë të përhapjes së panikut ekonomik dhe social duke përdorur atë që njohin më mirë baltën dhe mashtrimin.