Seanca plenare u shoqërua me tensione të larta në sallën e Kuvendit sot, në momentin e debateve mes kampeve politike për rendin e ditës dhe kalendarin e punimeve, ku opozita ishte kundër projektbuxhetit pa paketë fiskale dhe kundër ligjit të barazisë gjinore.
Deputeti Belind Këlliçi iu drejtua kryeparlamentarit Niko Peleshi me kërkesë për përjashtimin e Ballës nga Kuvendi për shkak të fyerjeve të përsëritura ndaj deputetëve të opozitës.
Ai sugjeroi të merreshin 10 minuta pushim dhe të vendosej për kërkesën e opozitës.
“Kreu i grupit parlamentar të PS fyu drejtëpërdrejtë deputetët e opozitës duke përdorur termin
‘Nuk jam si këta që lehin!’ apo ‘nuk jam si rraca e këtyre’. Kërcënoi deputetin Balliu. Duke i thënë ta tregoj unë ty, se ‘me ty merrem unë’. Ndërkohë intimidoi deputetë të tjerë duke i thënë mashtrues e gënjeshtarë.
Në emër të grupit kërkoj të merret masa për përjashtmin e deputetit Taulant Balla për fyerje të përsëritur ndaj deputetëve të opozitës.
Ndërpri seancën merr 10 minuta pushim, verifiko kamerat dhe verifiko qëndrimin që ka PD” – tha ai.
Peleshi i kujtoi nenin 65 të Rregullores, duke i thënë se kërkesa bëhet në Sekretariat dhe jo tek ai, në Komisionin e Etikës.
Ndërkohë ish-kryeparlamentarja Jozefina Topalli i kërkoi Peleshit të ndërpriste seancën sipas kërkesës së bërë nga grupi i PD dhe të merrej vendim për rastin e Ballës.
“Përfaqësuesi ynë i grupit parlamentar ju kërkoi ndërprerjen e seancës dhe marrjen e masës. Je i detyruar pë të ndërprerë seancën plenare, ndërprite dhe pastaj vijo me rendin e ditës”, tha Topalli.
