Deputeti i Partisë Demokratike, Luçiano Boçi, deklaroi nga Kuvendi se reforma territoriale e ka “copëtuar Shqipërinë” dhe ka sjellë mungesë të theksuar shërbimesh për qytetarët, duke e cilësuar atë një dështim të plotë.
Sipas Boçit, vendi është lënë “bosh” dhe pa funksionim normal të administratës lokale, ndërsa e njëjta mazhorancë, sipas tij, po përpiqet ta rikthejë sërish të njëjtën reformë.
“E bëtë copë Shqipërinë me reformën territoriale dhe sot nuk ka shërbime. E keni boshatisur vendin dhe tani jeni po ju që doni ta bëni prapë,” u shpreh deputeti demokrat.
Ai theksoi se Partia Demokratike do të paraqesë alternativën e saj për reformën territoriale dhe paralajmëroi se opozita do ta çojë këtë çështje edhe në shesh, përmes protestave. “Ne do të japim opsionin tonë. Ajo që keni bërë është turp mbi turp. Ky Parlament është i mbushur me turp,” deklaroi Boçi.
Nga ana e tij kreu i grupit të Partisë Socialiste, Taulant Balla i la afat opozitës deri në mbrëmje për të vendosur nëse do shkojnë apo jo në komisionin për Reformën Territoriale.
Nga foltorja e Kuvendit, Balla ironizoi opozitën pas mbledhjes së grupit, duke thënë se çfarë thonë në darkë nuk e thonë në mëngjes.
“Ça thoni në darkë nuk e thoni në mëngjes. Më komunikuan mbrëmë që ju jeni tërhequr nga bojkoti, të paktën këtë haber na keni sjell dje. Sot shoh që jeni tërhequr nga ajo që keni vendos dje. Këta nuk janë tërhequr nga bojkoti. Jeni aq kakafonik sa për një çështje çoheni 2 veta. Tani jeni shpartalluar se ca kanë ik, ca janë pa qejf, ca nuk vinë. Zonja dhe zotërinj të PD-së, ju angazhoheni që të merrni pjesë rregullisht në mbledhje të Komisionit, ta dimë. Këtë gjë e keni deri në darkë, kur të vijë vendimi. Në rast se na thoni do vijmë në mbledhje, jo kjo historia që i thashë bashkëkryetarit, se unë nuk isha, nuk bëhet mbledhja e komisionit me 8, se 8 e do dhe një të bëhet 9 dhe të jetë 1 më shumë se gjysma. Ne po ju themi, nëse ju vini nuk ka nevojë ta ndryshojmë, na e thoni deri në darkë, se në mëngjes keni mend të tjera, në darkë mend të tjera”, tha Balla.
Më tej Boçi e quajti turp ultimatumin e socialistëve nga Konferenca e Kryetarëve dhe përpjekja për ta marrë kontrollin e Territoriales.
“Kjo është e turpshme dhe më e turpshme ultimatumi në Konferencë. Nëse do e ktheni në ndëshkim për opozitën, bëjeni. I morët të gjitha, merrni edhe Komisionet e Përhershme, merrni dhe anëtarët e komisionit. E shikoni ku ka arritur fantazia dhe çmenduria juaj, anëtarët e komisionit kërkojnë ndryshimin e komisionit. Si mundet e njëjta trupë që e ka votuar atë, të votojë përsëri për të hequr paritetin e vendosur po nga ju. Pse mo, çfarë jeni ju që i bëni këto, pa dakordësi, e bëtë reformën territoriale, ishit ju dhe dështuat. Ne do jemi në shesh dhe jo me ju, jo me shumicën tuaj, ky është turp por me ju çfarë nuk shihet dhe çfarë nuk dyshohet. Nuk ka pasur mbledhje të vlefshme në Komision, mbledhja thirret me kryesinë e Komisionit dhe nuk dilni dot në konkluzion që kemi qenë apo jo”, tha Boçi.
