U arrestua nga RENEA, kush është Ilir Berberi/ Akuzat nga PD që në 2016 se e mbronte Rama

Forcat RENEA arrestuan tre persona të tjerë të dyshuar si autorë të ngjarjes së ndodhur pranë një hoteli në Tushemisht, ku u qëllua me breshëri armësh, disa ditë më parë.

Mes të arrestuarve është edhe Ilir Berberi. Ai u arrestua nga policia në një çadër që kishte ngritur enkas për t’u strehuar. Sipas policisë dyshohet të ketë rolin e organizatorit të ngjarjeve të ndodhura pranë hotelit në Tushemisht.

Berberi është një person me rrezikshmëri të lartë shoqërore dhe një emër i njohur për policinë, ku ka qenë i hetuar dhe dënuar për vepra të ndryshme kriminale.

Ilir Berberi ka qenë i dënuar për gjobvënie, vjedhje dhe armëmbajtje pa leje. Në Pogradec njihet si “Lili i Rrushkës”, ndërsa është hetuar edhe për disa ngjarje të rënda kriminale si për vrasjen e shefit të komisariatit në Pogradec, Argon Gjyrezi, raporton ABC News.

52-vjeçari ishte edhe një nga personat e shpallur në kërkim për sulmin me armë që u bë mbi hotel Voloreka në Pogradec, ku u qëlluan makinat e parkuara në hotel dhe po ashtu edhe në drejtim të dhomës së djalit të pronarit të hotelit, Jetmir Muçllari.

Po ashtu për ngjarjen në Tushemisht janë arrestuar Ilir Meçolli, Ardian Xhuti dhe Elvir Haxhia Ndërsa dy ditë më parë u arrestua Mariglen Topuzi.

Por emri i Ilir Berberit, është denoncuar që në vitin 2016 nga Partia Demokratike. Madje kjo e fundit e ka akuzuar Edi Ramën, se ka marrë në mbrojtje një grup kriminal që vepron në qytetin e Pogradecit dhe që në atë kohë kishte kërcënuar administratorin e ujësjellësit të këtij qyteti.

LEXO EDHE  Ikën kreu i AKU, Robert Lili/ Në vend të tij, anëtari i KQZ-së Bledar Skënderi?

Sipas PD-së, Rama po mbronte Ilir Berberin, një gjobvënës të njohur në Pogradec me nofkën “Lili i Rushkës”, i hetuar për disa ngjarje kriminale, përfshirë edhe vrasjen e një shefi policie dhe disa persona të tjerë me precedent penalë.

PD ka publikuar në atë kohë edhe skedën kriminale ku ndër të tjera theksonte se “Ilir Berberi: I dënuar për gjobëvënie, vjedhje dhe armëmbatje pa leje. Në Pogradec njihet si Lili i Rrushkës. I hetuar edhe për disa ngjarje të rënda kriminale si për vrasjen e shefit të komisariatit në Pogradec Argon Gjyrezi.

Meardi Berberi: I ndjekur disa herë penalisht nga Prokuroria për tentativë vrasje, gjobvënie, plagosje e rëndë me dashje dhe armëmbajtje pa leje. Kreu 1.4 vite burg për gjobvënie. Ky person është në mbikqyrje të vazhdueshme nga Policia. Kanosi me armë Administratorin e ri të Ujësjellësit.

Bledar Berberi: I ndjekur penalisht nga Prokuroria për akuzën armëmbajtjes pa leje dhe trafikim armësh drejt Greqisë.

Mariglen Topuzi: I përfshirë në disa ngjarje të rënda kriminale me përdorimin e armëve të zjarrit.

Genci Allka: I ndjekur penalisht per tentative vrasje.

Xhuliano Topuzi dhe Aleks Mertkola të ndjekur penalisht nga Policia për trafik droge”, thuhej në deklaratën e PD më 24 shkurt 2016.

PD denonconte se “këta banditë që mbron Edi Rama jo vetëm kishin zaptuar Ujësjellësin, por kanë shkaktuar një dëm prej 300 milionë lekësh për 5 muaj vetëm me pagat, duke përfshirë dhe një rast ekzemplar abuzimi, si blerja me paratë e ujësjellësit të makinës private të drejtorit, në shifrën 74 milionë lekë”.