Nga Boldnews.al
Dy muaj pasi shkatërroi me buldozerë godinën historike të Teatrit Kombëtar, me argumentin se ishte rrënuar dhe nuk kishin para për ta rindërtuar, Bashkia e Tiranës e drejtuar nga Erion Veliaj ka vendosur të shpenzojnë rreth 15 milionë euro për “rijetëzimin e Piramidës”, ish-muzeu i krijuar në vitet e komunizmit për të lartësuar figurën e diktatorit Enver Hoxha.
Këtë fillim jave, Bashkia e Tiranës ka shpallur tenderin për rijetëzimin e Piramidës, në Bulevardin kryesor të qytetit, me një fond prej rreth 1.7 miliardë lekë (të reja).
Sipas të dhënave zyrtare, të konsultuar nga “Boldnews.al”, Bashkia e Tiranës pret ofertat e operatorëve ekonomikë deri në datën 2 Shtator 2020.
Piramida e Tiranës u ndërtua në vitin 1988, tre vjet pas vdekjes së diktatorit Enver Hoxha. E gjithë sipërfaqja e godinës, futuriste për kohën, ishte në shërbim të idealizimit të figurës së ish-diktatorit komunist.
Pas viteve ’90, ajo ndryshoi emrin dhe u shndërrua në Qendrën Kombëtare të Kulturës, por që, për banorët e kryeqytetit, u konsiderua gjithnjë si “Piramida e Enverit”.
Tashmë, Bashkia e drejtuar nga Veliaj ka vendosur të kryejë një shpenzim kolosal, për ta shndërruar godinën piramidale në një qendër aktivitetesh kulturore, siç deklarohet zyrtarisht.
Por, “rijetëzimi i Piramidës” dhe, sidomos shifra 15 milionë euro për projektin, duket se shkon në të kundërt të asaj që vetë ka deklaruar Bashkia e Tiranës për mungesë fondesh.
Për rreth një vit e gjysëm, kur po diskutohej mes protestash prishja e Teatrit Kombëtar, një ndërtesë historike e ndërtuar në vitet ’40, Veliaj dhe zyrtarët në varësi të tij u shprehën se dëmtimet e godinës ishin të mëdha dhe institucioni nuk kishte para për ta rehabilituar.
Sipas përllogaritjeve të deklaruara nga Bashkia, por asnjëherë të bëra publike, rindërtimi/rikonstruksioni i Teatrit Kombëtar arrinte në shifrën 32 milionë euro.
Bashkia u deklarua e pafuqishme për të shpenzuar këtë shifër për Teatrin dhe “gjeti” mënyrën më normale për 7 vitet e qeverisjes së ‘Rilindjes”-partneritetin Publik Privat.
Ajo që tashmë dihet nga të gjithë, dhe jo vetëm në Shqipëri, është fakti që Teatri i ri Kombëtar, nëse do të ringrihet sërish, do të jetë pjesë e një kompleksi kullash tregtare private, në qendër të Tiranës.
Pra, për ndërtesën historike të kryeqytetit, atë të Teatrit Kombëtar, e ndërtuar me një stil të ngjashëm me godina në Europën Perëndimore, Bashkia e Veliajt nuk kishte para dhe “u fal” tek biznesi privat.
Ndërsa, për godinën piramidale, me një histori të lidhur vetëm me figurën e ish-diktatorit komunist, rezulton se Bashkia e Tiranës i ka në dispozicion rreth 15 milionë euro për “rehabilitimin e saj”.
